Tabakaleran ez da aditua izan behar astronomiaz gozatzeko

Iazko Perseidak, Jaizkibel mendian.
Iazko Perseidak, Jaizkibel mendian. / ARIZMENDI

Hirikilabs laborategiak eta Aranzadi Zientzia Elkarteak familientzako lantegiak, astro-argazkigintza solasaldiak eta Perseiden behaketarako irteerak eskainiko dituzte

Izar uso edo Perseiden momenturik ikusgarrienarekin bat eginez, abuztuaren 10etik 12ra, Hirikilabs, Tabakalerako Kultura Digitala eta Teknologia Laborategiak Hiritar Astronomia Topaketa antolatu du, Aranzadi Zientzia Elkartearekin elkarlanean. Hiru egunez publiko orokorrari eta zaletuei zuzendutako ekimenak eskainiko dituzte, besteak beste, familientzako lantegia edota astroargazkigintza hitzaldia.

Hirikilabsek iaz heldu zion lehendabizikoz gizartean zaletasun handia pizten duen ezagutzaren eremu honi. Ezohiko modu batean, halere: irrati uhinen bitartez espazioan dauden objektuak jarraitzeko lantegia burutuz, alegia. Hala bada, gauez eta teleskopioa medio izar-euria ikusi ezeze, Perseidak egun argitan egiten duten bidaia aztertzeko aukera ere izan zuten parte hartzaileek, baita bestelako espazioko gorputz batzuk ere, ISS nazioarteko estazioa kasu.

Aurten, Hiritar Astronomia Topaketan bilakatuta, eta astronomian modu zabalago batean murgiltzeko aukera eskaintzeko xedearekin, Aranzadi Zientzia Elkartearekin elkarlanean hainbat jarduera antolatu ditu Hirikilabsek: izar-erloju bat eraikitzeko familiei zuzendutako lantegia, Newton erako teleskopio bat eraikitzeko lantegia eta astro-argazkilaritzaren inguruan hitzaldi-solasaldi bat. Eta ikasitako guztia praktikan jartzeko gauean Perseidak ikusteko irteerak egingo dituzte.

Hau guztia gauzatzeko hainbat gonbidatuk hartuko dute parte, besteak beste, Aranzadi Zientzia Elkarteko kide Virginia García, Mikel Castander, Alberto Castrillo, Juan Carlos Martín eta Eduardo Zubiak eta Hirikilabs-eko kolaboratzaile eta ASHAB - Asturias High Altitude Balloning elkarteko kide David Pellok.

Astronomia Hiritar Topaketako lantegiak eta hitzaldiak doakoak dira, baina aldez aurretik izena eman beharra dago tabakalera.eu webgunean.

Temas

Euskera

Fotos

Vídeos