«Asko gozatu dugu euskaldunok finalarekin», esan du Iñaki Muruak

Zortzi finalistak: Lujanbio, Arzallus, Sarriegi, Agirre, Colina, Elortza eta Mendiluze/Arizmendi
Zortzi finalistak: Lujanbio, Arzallus, Sarriegi, Agirre, Colina, Elortza eta Mendiluze / Arizmendi

Saioa amaitu ostean, Sarriegik eta Elortzak adierazi zuten gehiago ez direla txapelketan jardungo

ELI BELAUNTZARAN BARAKALDO.

Harmailak hustu zirenean bertsolarien adierazpenak entzuteko parada izan zen BEC-eko areto handian. Ordu ugari oholtza gainean pasa ondoren, egun luze baten inguruan hitz egiteko txanda iritsi zen. Bertan, izandako bizipenei buruz azpimarratzeko une izan zen. Zapore gazi gozoak bizi izan zuten denek ere, baina atzokoan gozoekin gelditu ziren gehienek eta Murua lehendakariak esandako hitzek laburbildu zuten 2017ko finala: «Aurtengo finalarekin asko gozatu dugu bertsozaleok eta euskaldunok. Maila oso ona izan da gaurkoan eta lagun denek egin dute lan aipagarriren bat egunean zehar. Ederra izan da, gorabehera batzuk izan arren».

Ondoan Maialen Lujanbio zuen. Txapeldunak nekatu aurpegia zuen saioa amaitu ostean. Hernaniarrak irribarrea erakusten zuen zoriontzen zuten bakoitzean, baina eguna luze izandakaroan arrastoa antzematen zitzaion. Aitortu zuenez «BEC-a plaza izugarria izan da. Jendea dena emateko zegoen saio guztian zehar. Sumatzen zen lehertzen zela saio bakoitzean, eta eguna gogorra izan arren, onarekin gelditzen naiz. Saioaren edertasuna eta maila ona nabarmenduko nuke».

Aitor Mendiluze lasai ikusten zen finala eta gero. Andoaindarrak «saioa ongi joan da» esanez hasi zuen prentsa aurrean egindako agerraldia. «Oso mimatuta sentitu gara antolakuntza aldetik. Dena bikain egon da». Eta gaineratu: «Jendea oso txukun egon da. Harreta erakutsi du denbora guztian gurekiko». Mendiluzek hitz onak zituen egunari buruz hitz egiterakoan: «Gure artean giro ederra egon da».

Unai Agirreren aurpegiak dena esaten zuen finalaren inguruan hitz egiterakoan. Hernaniarra pozik zegoen eta pozik egoteko arrazoi ugari eta onak zituen atzokoan. Aitortu zuenez «ez diot garrantzirik eman zortzigarren postuan gelditzeari». Han egotea sari bat bezala hartu zuen Agirrek eta «sentsazio oso onak utzi dizkit saioak. Emozio aldetik ikaragarria izan da. Plaza berezia izan da BEC-en lagun guzti hauekin». Agirrek esan zuenez, «oso polita izan da finalean parte hartzea, baina oso gogorra, gelditzen naiz onarekin eta BEC-a leku ederra dela kantatzeko».

Beñat Gaztelumendi ere irribarretsu hitz egin zuen finalari buruz. «Bigarren finala izan da niretzat eta mimatua sentitu naiz eta gainera, elkar zaindu dugu» esan zuen oholtza gainean egon zen zortikotearen inguruan hitz egiterakoan. «Maielenek bigarren txapela egunean hemen egotea ohore handia izan da nirtetzat» aitortu zuen gazteak. «Finala ondo joan eta maila ona» izan zela azpimarratu nahi izan zuen donostiarrak.

Elortza, gazi-gozo

Igor Elortza berriz, sentsazio gaziak izan omen zituen atzoko finalean. Esan zuenez, «asko sufritzeko eguna izan da». Aurretik, bere agurreko bertsoan, iragarria zuen bere azkeneko finala izan zela.

Despedidako bertsoan azkeneko finala zuela esandako beste bat Aitor Sarriegi beasaindarra izan zen. «Eta ohore handia izan da niretzat hemen egotea», gaineratu zuen. Goierritarrak esan zuenez «barrutik gorabehera» handiak izan omen zituen, «baina oso oroitzapen ona izango dut». Aurrerantzean, Sarriegi plazatan ikusteko aukera izango dute bertsozaleek, baina final handiak bukatu omen dira beretzat.

Sustrai Colina ere sentsazio goxoarekin gelditu zela esan zuen. Bertan egotea Urruñako bertsolariarentzat pozgarria izan omen da. Amets Arzalluzek berriz, «sentsazio ona» zuen finalean bizi izan duenagatik, baina «zapore gazi-gozoa pertsonalki» utzi dio egindako lanak.

Temas

Euskera

Contenido Patrocinado

Fotos

Vídeos