Amaia Elizaran eta Mystérieuses Coiffures konpainia izendatu dituzte kale artista hoberen

Amaia Elizaran dantzaria/
Amaia Elizaran dantzaria

Karrikan plataformak eman die saria, Pirinioen alde bietako eragileen arteko lankidetza-proiektuak sustatzen dituena, eskualdeen arteko harremanak sendotzeko asmoz

Amaia Elizaranen 'Block' dantza garaikideko pieza eta Mystérieuses Coiffures konpainiaren 'La leyenda del hombre pájaro' ipuin onirikoa saritu dituzte Karrikan plataformaren bigarren edizioan aurkeztu diren 20 proiektuen artetik; plataforma horrek Euskal herriko kaleko arteen sorkuntza sustatzen du.

"Originaltasunagatik, planteamendu artistikoaren zailtasunagatik eta proiektuen bideragarritasunagatik" eman diete Karrikaneko kideek baloraziorik handiena 'Block' eta 'La leyenda del hombre pájaro' pieza artistikoei.

Emakume biren arteko dantza-lan bat da Block; Amaia Elizaran bera eta Leire Otamendi dira emakume horiek, harremanak gorputzaren bitartez dituztenak eta euren artean aurkakotasun -eta blokeo- indarrak sortzen dituztenak erresistentzia horietan oinarritutako hizkuntza propio bat eraikitzeko helburu irmoarekin.

Bestalde, La leyenda del hombre pájaro lanak, hura ere hastapenetan, habia handi baten inguruan elkartuko ditu Christophe Pavia artista eta Mélanie Spettel dantzaria; oso pieza bisuala da, eta habia horretatik sortuko da txori-gizona. Ikuskizun biek maiatzera arte garatuko dute euren sorkuntza-prozesua, eta, horretarako, egonaldi artistikoak egingo dituzte, Karrikanek eskainiak, leku hauetan: Hameka Karrikako Arteen Fabrikan, Luhuson (Lapurdi); Harrobia ekoizpen eszenikorako zentroan, Bilbon; Mendi Zolan kulturgunean, Hendaian (Lapurdi), eta Gipuzkoako Dantzagunea sorkuntza-zentroan, Errenterian. Pieza biak Hendaiako Antzerkiaren Maiatza jaialdian estreinatuko dira 2018ko maiatzaren erdialdean.

Arte eszenikoen bi isurialdeak

Karrikan 2016an sortutako plataforma bat da, kaleko arte eszenikoak Pirinioen alde bietan lagundu eta sustatzeko helburuarekin. Gaur egun, plataformako kide dira: Gasteizko, Bilboko, Iruñeko, Hendaiako eta Libourneko udalak, Euskal Elkargoa-Hameka eta Nafarroako Quiero Teatro antzerki-sustatzailea. Arrigorriaga, Iurreta eta Zarauzko udalak kide laguntzaileak dira.

Konpainia biei laguntza hauek emango dizkiete: guztira 24.000 euroko laguntza ekonomikoa , hiru sorkuntza-egonaldi egiteko laguntza eta programatua eta hurrengo jaialdietan parte hartzeko aukera: Hendaiako Antzerkiaren Maiatza, Gasteizko KaldeArte , Bilboko Kalealdia , Libourneko Fest’Arts; Iruñeko Harresietako Jaialdia , Hameka Karrikako Arteen Fabrikako Abian!, Arrigorriagako Clown Jaialdia , Iurretako Kalez Kale eta Zarauzko Kalerki.

Administrazio-aholkularitza ere izango dute, konpainien premietara egokitua. Karrikanek hitzarmen bat du Akitania-Euskadi-Nafarroa Euroeskualdea rekin, Pirinioen alde bietako eragileen arteko lankidetza-proiektuak sustatzeko, eskualdeen arteko harremanak sendotu nahi baitira garapena laguntzen duten jardueren alde eginez.

Euskal Herriko kaleko arteen egoeraren ikuspegi bateratua eman nahi du Karrikanek, uste baitute "agerian gelditu dela kaleko arteetan sorkuntzaren aldeko laguntzak ez direla behar bestekoak, bereziki sortzen ari diren konpainia edo artistentzat, eta horrela osatu nahi dira, edo ordeztu kasu batzuetan, alor horretako gabeziak", antolatzaileek azaldu dutenez.

Temas

Euskera

Contenido Patrocinado

Fotos

Vídeos