Diario Vasco

Sarako Idazleen Biltzarra: egunak gehiago, bisitariak berdintsu

  • Piarres Larzabal antzerkigilea eta 'Maiatz' aldizkaria izan dira protagonista

Sarako Idazleen Biltzarrak hazten jarraitzen du. Aurten, lehenbiziko aldiz, bi egunez egin da bilkura, Pazko igandean eta Pazko astelehenean. Baina lehenbiziko egun horretan ez zen jende askorik hurbildu. Astelehen honetan jende gehixeago inguratu da.

Azken urteotan, haurrengana hurbiltzen saiatu da Idazleen Biltzarra eta, adibidez, Ziburuko kolegioko ikasleen lanak liburuxka batean argitaratu dituzte. Bernart Etxepare lizeoko ikasleek, berriz, Kirmen Uribe idazlearen azken lanaren inguruko zuzeneko telebista emankizun bat prestatu dute azokarako, idazlearekin harremanetan,emaitza igandean aurkeztu zutelarik.

Editoreen gunea da aurtengo berrikuntzetako bat. Lanen bat argitaratu nahi duen jendeak editoreekin elkartu eta hitz egiteko gunea izan da, eta bertan sei editore egon dira. Gune digitalean, berriz, lanak modu digitalean irakurtzeko gailuak jarri dituzte bisitarien eskura.

Astelehen honetan hiru lagun omendu dituzte, hirurak duela gutxi hilak: Marijane Minaberri haurrentzako idazlea, Piarres Charritton idazle, euskaltzale eta euskaltzaina, eta Hasier Etxeberria telebista-kazetari eta idazlea.

Bestalde, ekitaldia izan da 'Maiatz' aldizkariaren 35 urteak gogorarazteko. Bertako koordinatzaile izan den –eta oraindik ere baden– Lucien Etxezaharretak adierazi duenez, «Euskal Heri idiliko hari kontrajarrita zegoen aldizkaria» egin nahi izan zuten. Literatur lanak bildu eta erakustea zuen helburu, eta hasierako kolaboratzaileen artean honako hauek daude: Itxaro Borda, Agustin Zamora, Aurelia Arkotxa, Emilio Lopez Adan 'Beltza', Manex Erdozaintzi-Etxart eta Manex Lanatua.

Bestalde, Euskaltzaindiak bere bi argitalpen aurkeztu ditu: 'Euskaltzaindiaren hiztegia' –hiztegi honen bigarren argitaraldia, iaz plazaratua– eta Ixabel Etxeberriaren doktore-tesia, Piarres Larzabalen antzerki-lanei buruzkoa. Bertan bada sekula publikatu gabeko eta taularatu gabeko antzezlan bat, Larzabalen azkena, 1982ko 'Gorderik dagoena', hain zuzen ere.

Temas

Recibe nuestras newsletters en tu email

Apúntate