Diario Vasco

Julio Soto, Berako txapeldun

Julio Soto, Berako txapeldun
  • Lehen Nafarroako Bertsolari Txapelketaren finalaurrekoa 200 bertsozale baino gehiagoren aurrean egin zen

Apirilaren 8an Iruñeko Anaitasuna kiroldegian izango den finalerako txartela eskuratu zuen atzo Beran txapeldun suertatu zen Julio Sotok, Berako Kultur Etxean Nafarroako Bertsolari Txapelketaren lehen finalaurrekoa bertatik bertara jarraitu zutenen konpainian.

43. Nafarroako Bertsolari Txapelketaren lehen finalaurrekoa, aretoa bete zuten 200 bertsozale baino gehiagoren aurrean egin zen. Alazne Untxalo, Iñigo Olaetxea, Ander Fuentes 'Itturri', Julio Soto, Kotte Plaza eta Eneko Lazkoz aritu ziren kantuan. Alaitz Rekondo aritu zen gai-jartzaile lanetan.

Saio puntugarriaren ostean, Julio Sotok eskuratu du puntu gehien, 422,5, eta horrenbestez, apirilaren 8an Iruñean jokatuko den finalerako sailkapen zuzena eskuratu du. Haren atzetik sailkatu dira Eneko Lazkoz, Ander Fuentes 'Itturri', Kotte Plaza, Iñigo Olaetxea eta Alazne Untxalo. Bost bertsolari hauek finalaurreko faseko azken puntuazioen zain egon beharko dute hurrengo fasera sailkatzen diren jakiteko. Osotara, zortzi bertsolari pasako dira finalera, oraingo 18tatik.

Gaur izango du segida Nafarroako Bertsolari Txapelketak, Antsoaingo Antzokian, 17:30ean. Han ariko dira Xabier Terreros, Xabier Maia, Iker Gorosterrazu, Saioa Alkaiza, Josu Sanjurjo eta Mikel Lasarte.

www.bertsosarrerak.eus atarian eskuratu daitezke Antsoaingo saiorako sarrerak. Antsoaingo Antzokiko leihatiletan ere eskuratu ahal izango dira, 16:00etatik aurrera.

Temas

Recibe nuestras newsletters en tu email

Apúntate