Diario Vasco

Buenos Aires, euskal kulturaren erakusleiho

Buenos Aires, euskal kulturaren erakusleiho
  • Munduko euskal etxerik zaharrenak antolatu du ekimena, Laurak Bat-ek, 140. urteurrenean

Bingen Zupiria Eusko Jaurlaritzako Kultura eta Hizkuntza Politikako Sailburua ‘Buenos Aires celebra al País Vasco’ jaialdiaren inaugurazioa izan zen atzo. Ekimena Avenida de Mayo etorbide ezagunean ospatu zen eta, Argentinako euskal komunitatea batzeaz gain, hiri osoko milaka biztanle erakartu zituen, euskal kulturaren erakusleiho izanik.

Adrián Varela Kolektibitateen zuzendaria, Pamela Malewicz Giza Eskubideen eta Kultura Aniztasunerako idazkariordea eta Arantxa Anitua Laurak Bateko presidentea izan dira, Bingen Zupiria Eusko Jaurlaritzako kultura eta hizkuntza politikako sailburuarekin batera, lehen agurra egiteko arduradunak. Euskal etxeko haurren desfile bat ere egin zuten eta, horren ostean, Lagun Onak taldeak aurreskua eskaini zuen. 40 stand baino gehiago izango dira, euskara, kirolak, genealogia edota gastronomiarekin lotutakoak.

‘Buenos Aires celebra…’ jaialdia

Buenos Aireseko Udalak (Hiri Autonomoaren Gobernuak) sustatutako ekimen bat da ‘Buenos aires celebra…’, eta bi helburu nagusi ditu. Batetik, jatorri ezberdinetako komunitate ezberdinei beren kulturaren inguruan biltzeko aukera eman nahi zaie, ospakizun handi bat sortuz hiriaren bihotzean. Bestetik, kultura erakustaldi horiek erakutsi nahi zaizkie Buenos Aireseko gainontzeko biztanleei. 2009az geroztik ospatzen da jaialdi hau eta, euskal komunitateari lotutako jardunaldiari dagokienez, Laurak Bat euskal etxea arduratzen da antolaketaz. Aurten, Laurak Bat euskal etxearen 140 urteurrenak bat egin du jaialdiaren ospakizunarekin. 1877ko martxoaren 13an sortua, munduko euskal etxerik zaharrena da Laurak Bat.

Azken Karlistadaren ostean Euskaditik heldutako 13 gaztek sortu zuten Laurak Bat euskal etxea eta bere barnean Gernikako arbolaren kimu bat dago (1906an landatutakoa). Gaur egun, 407 bazkide ditu zentroak eta euskal kulturarekin zerikusia duten era guztietako jarduerak antolatzen dituzte (euskara eskolak, mus txapelketak, pilota partidak, dantzak…). Argentinako euskal etxerik dinamikoenetako bat da Laurak Bat.

Temas

Recibe nuestras newsletters en tu email

Apúntate