Diario Vasco

Hiru egunez, sei bertso saio Herriartekoan

Erniarraitz 1 taldeko azpeitiarrak.
Erniarraitz 1 taldeko azpeitiarrak.
  • Binaka, hamabi talde arituko dira Alegian, Azpeitian, Zarautzen, Oñatin, Anoetan eta Astigarragan egingo diren saioetan

Lehen asteburu arrakastatsuaren ondotik, badator bigarrena Gipuzkoako Herriartekoan. Taldeka jokatzen den txapelketa honetan, hain zuzen, bina talderen artean jokatuko diren sei saio egingo dira ostiraletik igandera bitartean.

Aurrenekoak ostiral honetan jokatuko dira. Lehen saioa '7 astoren gainean' (Alegia) eta 'Aizkorpe' (Segura eta Ataun) taldeek jokatuko dute Alegiako Gaztetxean ostiral honetantxe. 20:30ean hasiko da zahagi ardoa, ondoren, taula gaineko saioa hasiko da. Egun bereko 21:00etan, Azpeitiko San Agustin Kultur gunean, 'Erniarraitz 1' (Azpeitia) eta 'Lexoti' (Oiartzun) taldeak aurrez aurre jarriko dituen bertso afaria hasiko da. 22:00etan, berriz, Zarauzko Putzuzulo gaztetxean, 'Hitza ote hitza?' (Zarautz) eta 'Osinalde'-ren (Gabiria) bertso saioa izango da.

Larunbatarekin, 'Txinparta 1' eta 'Martzelina' taldeak arituko dira Oñatiko Oinarri elkartean egingo den bertso afarian. Afaria 20:30ean hasiko da, eta, afal ostean, nahi duena gerturatu daiteke saioa ikustera.

Asteburua amaitzeko, otsailaren 12an, igandearekin beste bi saio izango dira Anoetan eta Astigarragan. Anoetako Kuku Elkartean '26+' (Abaltzisketa, Amezketa, Anoeta, Berastegi) eta 'Debagoiena'-ren (Arrasate, Bergara, Aretxabaleta, Eskoriatza) arteko bertso bazkaria izango da. 18:00etan, berriz, Astigarragako Zipotza elkartean bertso saioa eta ondoren afari merienda egingo dute 'Astigarragak' eta 'Tulipanak' (Zarautz) taldeek.

38 talderen artean jokatuko den Herriarteko txapelketa joan den asteburuan abiatu zen, hiru saiorekin. Giro bikaina izan zen nagusi Azkoitian, Lasarte-Orian eta Zarautzen burutu ziren saioetan, eta 'Ran rober ran' (Zarautz), Lasarte-Oriako bertso eskola eta 'Sarri nahi genuen baina Habana etorri zaigu' (Orio) taldeak izan ziren garaile, hurrenez hurren.

Temas

Recibe nuestras newsletters en tu email

Apúntate