Diario Vasco

Txillardegi izango dute gogoan Donostian

2009ko argazkian, Koldo Izagirre, Fito Rodriguez eta Txillardegi bera.
2009ko argazkian, Koldo Izagirre, Fito Rodriguez eta Txillardegi bera. / USOZ
  • Haren heriotzaren 5. urteurrena dela eta, zenbait ekitaldi antolatu ditu 'Txillardegi liburutegia' kultur ekimenak

Jose Luis Alvarez Enparantza 'Txillardegi' euskal idazle, hizkuntzalari eta politikaria 2012ko urtarrilaren 14an hil zen Donostian, 84 urte zituela. Euskal eragile nagusietakoa zendu eta bi urtera, Donostiako zenbait idazlek eskatu zuten, Udaleko erregistroan aurkeztutako agiri baten bidez, hiriko liburutegi nagusia'Txillardegi Liburutegia' izendatua izan zedin. «Honela, gure hizkuntzari eta gure hiriari hainbeste eman dion idazlearen oroimenak merezi duen lekua hartuko luke, Koldo Mitxelenak, Carlos Santamariak eta Inazio Mª Barriolak hartu duten bezala», zioten, Foru Aldundiak eta Gipuzkoako Foru Aldundiak hurrenez hurren hiru pertsonaia horien izena hiru eraikin esanguratsuri eman dietela gogoratuz.

Eskaerak, bistan da, ez du baiezko erantzunik izan, eta behin baino gehiagotan berretsi dute. Azkeneko agerraldia izan zen abenduaren 17an egin zuten firma bilketa, orduantxe aurreratu zutelarik Txillardegiren heriotzaren bosgarren urteurrenaren bueltan haren omenezko egitaraua jarriko zutela abian. Bada datorren astean abiatuko dira 'Txillardegi Liburutegia' kultur ekimenak antolatutako saioak, 'Txillardegi gogoan' izenburupean burutuko direnak.

Aurrenekoa urtarrilaren 13an egingo da, urteurrenaren bezperan, San Jeronimo kaleak kokatutako udal liburutegi nagusi zaharreko sotoan. Egun horretan, ostiralarekin, 'Txillardegi gogoan' bideoaren aurrestreinaldia egingo da 18:30ean, Kote Camachoren eskutik.

Urtarrilaren 15ean, igandea, ekitaldi literario-musikala egingo da 11:30etik aurrera Lasala Plazan, Rafa Egigurenen eta Dorleta Urretabizkaiaren eskutik, eta hilaren 18an, asteazkena, mintegi ireki bat egingo da existentzialismoaz EHUren Filosofia fakultatean, Fito Rodriguez gidari dela. Azkeneko ekitaldia otsailaren 10ean egingo da, eta Txillardegik ekologismoaren alorrean egindako lana ekarriko du gogora, Eguzki taldeak antolatuta, Markos Zapiain eta Martin Ansoren eskutik.

Temas

Recibe nuestras newsletters en tu email

Apúntate