Diario Vasco

35 nobedade eramango ditu Ipar Euskal Herriak Durangora

35 nobedade eramango ditu Ipar Euskal  Herriak Durangora
  • 40 kultur ekitaldi eskainiko dituzte, eta 11 eragilek izango dute ordezkaritza Azokan

Durangoko Azoka antolatzen duen Gerediaga Elkartearen eta Ipar Euskal Herriko Euskal Kultur Erakundearen arteko lankidetza orain dela hamar urte abiatu zen eta, lehendik ere Iparraldeko sortzaile eta eragileek Azokan presentzia izan arren, orduz geroztik nabarmenagoa da haien presentzia Landakoko erakusgunean zein Azoka osatzen duten gainerako guneetan. Ateak abenduaren 2an zabalduko dituen 51. edizioari egingo dioten ekarpena asteazken honetan aurkeztu dute Baionan Nerea Mujika Gerediaga Elkarteko lehendakariak eta EKEko zuzendari Pantxoa Etchegoinek.

Aurkezpenean gogoratu dutenez, urtero Azokan aurkezten diren berritasunen %10 inguru Iparraldeko ekoizpenak dira, 30 bat gutxi gorabebera. Aurtengo edizioan ere «proposamen ainitza» izango da Iparraldeak Durangora eramango duena. Urteroko liburu eta disko aurkezpenez gain, Azokaren guneetan Iparraldeko sortzaile eta eragile kulturalen presentzia askoz handiagoa izanen dela nabarmendu dute: hitzaldiak egitasmo berritzaileak aurkezteko; parte hartzeak mahai-inguruetan; haur eta publiko guziendako antzerki emanaldiak edo dokumental proiekzioak.

Hartara, 35 nobedade eramango dituzte Azokara (19 liburu, 3 liburu-disko, 9 disko, 3 DVD eta egutegi bat, Seaskarena) eta 40 kultur ekitaldi eskainiko dituzte (kontzertuak, hitzaldiak, proiekzioak, haur eta publiko guziendako antzerki emanaldiak…). Ezin da ahaztu, gainera, Ipar Euskal Herrikoa dela 2016ko kartela sortu duen Christine Etchevers, eta Argizaiola sariak euskararen eta euskal kulturaren alde lan egin duten ‘xinaurriak’ omenduko baditu, badela horien artean Iparraldeko bat, Patxika Erramuzpe.

Bederatzi erakusmahaitan paratuko dituzte berritasunak Iparraldeko eragile eta argitaletxeek, denak elkarren ondoan, Goenkaleko 21etik 29ra arteko postuetan. Izan ere, Euskal Kultur Erakundeaz gain, Iparraldeko 10 eragile izango dira Azokan: bost argitaletxe (Maiatz, Ikas, Gatuzain, Zortziko eta Elkar); hiru diskoetxe (Agorila, ZTK eta Saroia) eta bestelako bi egitura (Aldudarrak Bideo eta Iparraldeko Ikastolak).

Temas

Recibe nuestras newsletters en tu email

Apúntate