Diario Vasco

Kulturgintza eta kultur politikak aztergai

  • Kultur politika beregaina beharrezkoa delako hipotesia landu dute zenbait autorek 'Jakin' aldizkariaren zenbaki bikoitzerako

Kulturgintzaren eta kultur politikaren izaeraren inguruko zenbait gogoeta bildu ditu 'Jakin' aldizkariak azken zenbakian. Zenbaki bikoitza da, 215-216.ak biltzen dituena, eta kultur ekosistema bizigarri bat osatzeko kultur politika beregaina egitea beharrezkoa delako hipotesitik abiatu da, auziari eskainiz 'Gai nagusia' izeneko saila.

Harkaitz Canok duela bi urteko 205. zenbakian botatako «Eta kultura autodeterminatuko balitz?» galdera berreskuratu eta horri erantzuten saiatzeko asmoz, uztailean ikastaroa antolatu zuen Jakinek UEUrekin batera Baionan. Hipotesi bat planteatu zen ikastaroan: kultur ekosistema bizigarri bat osatzeko kultur politika beregaina egitea beharrezkoa da, bai herrigintzako eragileen aldetik, bai sortzaileen aldetik, bai administrazio publikoaren aldetik. Horregatik, hiru eremu horietako aditu eta arituak bildu ziren eztabaidara. Bertan aurkeztutako hitzaldiak dakartza zenbaki honek.

Lehen artikuluan, Ibai Iztuetak ‘euskal eta kultura’ gaiari heldu dio, eta euskal kultura zein hizkuntzatan ote den posible galdera diskurtsoaren beraren materialtasunaren ikuspegitik aztertu du.

Hurrengo hiru artikuluetan, Haizea Barcenillak, Hedoi Etxartek eta Eider Rodriguezek, nork bere aldetik, kultur politika ereduei eta sortzaile eta eragile zibilen eta erakunde publikoen arteko harremanari erreparatu diote. Barcenillaren ustez, azken mende laurdenean Araban, Bizkaian eta Gipuzkoan garatu den kultur politikak paradigma aldaketa bat ekarri du, bereziki Guggenheim Museoaren irekierak kulturaren beraren definizioa eta praktika aldatu dituelakoan. Etxartek artearen, politikaren eta ekonomiaren arteko harreman ia beti gatazkatsua aztertu du begirada historikoa oinarri hartuta. Eta Rodriguezek etorkizuneko erronka eta neurri sorta zehatz bat proposatu du, kultura politikaren lehen lerrora ekartzeko.

Bosgarren artikuluan, Maika Etxekoparrek sortzailetzaz, hizkuntzez eta kulturaz idatzi du, kultur transmisioaren eta sormenaren arteko loturak eta etenak bere esperientzia propiotik azaltzeko.

Ondotik, zazpi kultur proiekturen diagnosia dator, ondoko galderak oinarri hartuta: zein da proiektuaren filosofia? Zein da gobernantza modua? Zer leku du euskarak eta euskal kulturak? Kultura nola ulertzen duzue? Zer nolako harremana eta lankidetza duzue kultur sortzaile eta eragileekin? Zer nolako harremana eta lankidetza duzue erakunde publikoekin? Donostiako Tabakalerari buruz Ane Rodriguez Kultura zuzendariak idatzi du, Astra kulturguneaz Leire Lopez Ziluaga eta Oier Plazak, Azpeitiko Kultur Mahaiaz Izaro Zinkunegik, Iruñeko Katakrak kultur kooperatibaz Nerea Fillatek, Lekornen egiten den Euskal Herria Zuzenean jaialdiaz Pauline Guellek, Gasteizko Hala Bedi Irratiaz Gaizka Amondarainek eta Bilboko Okela Sormen Lantegiaz Nora Aurrekoetxea, Izaro Ieregi eta Irati Urrestarazuk.

Egunen gurpilean atalean, ohikoa denez, Jakineko kolaboratzaile finkoek nork bere eremuari botatako begirada dator: Miren Artetxek kulturari, Henrike Galarzak ekonomiari, Txerra Rodriguezek soziolinguistikari eta Gorka Juliok teknologia eta sare digitalei.

Temas

Recibe nuestras newsletters en tu email

Apúntate