Diario Vasco

Bertsolaritza, aurten ere, Durangoko Azokan

Bertsolaritza, aurten ere, Durangoko Azokan
  • Ekoizpen berriak, berrargitalpenak eta bertsolaritzari loturiko materiala izango dira bertan

Durangoko Azokaren baitan eta argitalpenei dagokionez, lau nobedade topatu ahal izango dira aurten Bertsozale Elkartearen eta Lanku Kultur Zerbitzuen mahaian, Goienkaleko 41.ean: tartean, 2015eko Gipuzkoako Bertsolari Txapelketako liburua izango da eskuragai.

'Gipuzkoako Bertsolari Txapelketa 2015' liburu eta CDan Gipuzkoako Txapelketako fase ezberdinetako bertsoen hautaketa zabala jaso da. Gainera, Hiztegi Errimatuaren berrargitalpena, Jasota bezala bertso antologiaren hirugarren alea eta Mundu bat ahoz aho dokumentala izango dira salgai.

'Xabier Amurizaren Hiztegi Errimatua. Hitzaren Kirol Nazionala' bertsolaritzan erreferentea den liburua da eta aspaldi agortu zen. Berrargitaratu egin dute, eskakizunei kasu eginda, eta Durangoko Azokan izango da eskuragarri. Hirugarren edizio honi Andoni Egañak egingo dio hitzaurrea.

Diskoen atalean, Jasota bezala bertso antologien bilduman, Xabier Amurizaren bertsogintzari egingo zaio lekua, bat-bateko bertsogintza uzteko erabakia hartu baitu aurtengo maiatzean. Xabier Amurizaren bertsoz jantzitako disko bikoitza aterako da, CD batean plazan egindako bertsoak jasoko dira eta bestean, txapelketetan jarritakoak. Mundu bat ahoz aho dokumentala jasotzen duen DVDa ere Durangon izango da salgai.

Bestalde, Bizkaiko Bertsolari Txapelketako finalerako sarrerak ere salgai egongo dira.

Temas

Recibe nuestras newsletters en tu email

Apúntate