Diario Vasco

Euskal zinemaren historia gordetzen duen Ganbara

Kepa Sojoren 'Hileta' filmeko irudia.
Kepa Sojoren 'Hileta' filmeko irudia.
  • Euskarazko zinemagintzaren memoria denen eskura jarri du online eta doan kontsulta daitekeen datu-baseak

Zinea Sortzen enpresak eta Zinea.eus atariak bat egin dute euskarazko zinemagintzaren biltegitzat jo daitekeen Ganbara datu-basearen sorreran. Duela egun batzuk Donostian aurkeztu zen ekimena hutsune nabarmen bat betetzera etorri da, orain arte ez baitzegoen euskaraz egindako zinemaren argazki osoa eskaintzen zuen baliabiderik.

Euskal zinema azken urteotako kontua edota jarduera anekdotikoa dela uste duenak uste horiek berrikusi beharko ditu, datu-baseak erakusten baitu oinarri gabeak direla biak. Euskal zinema, alegia, ez da atzo goizekoa, eta ez da ale gutxi batzuek osatutako sorta… Orain arte 3.500 izenburu bildu dituzte, baina Zinea.eus atariaren kudeatzaile Maialen Goñik aurkezpenean esan zuen bezala, «oraindik asko ditugu zerrendara ekartzeko».

Zerrenda hori osatzeko aintzat hartu dira euskaraz egindako film luze eta laburrak, fikziozkoak, animaziozkoak zein dokumentalak. Ordena alfabetikoan eta hamarkadaka daude sailkatuta filmak, eta bilaketa egiteko aukera ere eskaintzen du guneak. Film bakoitzak bere fitxa du, sinopsia eta fitxa tekniko eta artistikoak biltzen dituena eta, berrienetan, pelikularen web gunerako esteka. Argazkiak, kritikak, berriak, filmak lortu dituen sariak eta bestelako informazio osagarririk ere eraman dute fitxara.

Ganbarak katalogo izaera hori du alde batetik, baina euskaraz filmatutako lanen zerrenda baio gehiago da. Izan ere, euskal zinema egin duten ekoizpen etxe eta profesionalak ezagutzeko aukera ere eskaintzen du atal banatan. Aurreneko urrats hauetan, «200dik gora filmen, 400 profesional baino gehiagoren eta 50 enpresa ingururen fitxak kontsulta daitezke, baita haiekin lotutako dozenaka albiste eta kritika ere».

Beste atal oso berezi bat ere badu atariak, gidoiei eskainia. Gutxi dira oraindik, baina atal hori ere zabalduz joango da. Zinea Sortzen enpresako zuzendari Ritxi Lizartzak aurkezpenean azaldu zuenez «Ganbara epe luzera sortutako egitasmoa da; etengabe osatzen eta betetzen joango den artxibategia. Horregatik, ikus-entzunezko industrian inplikatutakoen kolaborazioa ezinbestekoa da, datu-baseak hazten jarrai dezan».

Proiektuak Eusko Jaurlaritzaren eta Gipuzkoako Foru Aldundiaren babesa du, bai etaEuskadiko Filmategiaren laguntza ere. Era berean, lotura estua du Eusko Jaurlaritzako Kultura Sustatzeko Zuzendaritzaren Kultura Auzolanean egitasmoarekin, euskarazko ikus-entzunezko eduki guztiekin datu-basea osatzeko asmoa baitute, euskarazko zinemaren kontsumoa sustatzeko.

Temas

Recibe nuestras newsletters en tu email

Apúntate