Diario Vasco

Euskaltzainek beste lau urterako berretsi dute Zuzendaritza

Ostiral honetan Bilbon egin den bilkuraren irudia. Eskuineko aldean, Zuzendaritzako kideak.
Ostiral honetan Bilbon egin den bilkuraren irudia. Eskuineko aldean, Zuzendaritzako kideak. / EUSKALTZAINDIA
  • Osoko bilkuraren erabakiz, Andres Urrutiak jarraituko du euskaltzainburu, eta harekin jarraituko dute Zuzendaritzan Xarles Videgain, Xabier Kintana, Sagrario Aleman, Adolfo Arejita eta Jean-Baptiste Coyosek

Euskaltzaindiak ohar baten bidez adierazi duenez, Andres Urrutia euskaltzainburuak eta «beste lau urtez jarduteko Osoko bilkuraren konfiantza» jaso dute. Hala, Bilbon egin den bilkuran euskaltzainek Andres Urrutia berretsi dute euskaltzainburu karguan, eta bere ondoan izango dira orain arte Euskaltzaindiko Zuzendaritzako kideak izan direnak, hala nola: Xarles Videgain (buruordea), Xabier Kintana (idazkaria), Sagrario Aleman (diruzaina), Adolfo Arejita (Iker sailburua) eta Jean-Baptiste Coyos (Jagon sailburua).

Erabakia jakin ostean, Zuzendaritzak adierazi du bere lehen egitekoa izango dela orain arte indarrean egon den Plan Estrategikoa ebaluatzea eta Plan Estrategiko berria diseinatzea. Horrez gain, azken urteotako ildoari jarraituz, Akademiak egiten dituen lan eta ikerkuntza-proiektuak gizarteratzea, elkarte-erakundeen arteko harremanak indartzea (bereziki euskararen eremuan lanean ari direnekin) eta erabiltzaileen beharrei eraginkortasunez erantzutea izango dira 2017-2020 aldirako lehentasunak.

«Akademia modernoa eta hurbila behar du euskarak, eta horiek dira gure etorkizuneko asmoak: erabiltzailearengandik gertu egon, Akademiaren etxeko ateak gizarte guztiari zabaldu, zorrotz jokatu eta gure zerbitzu bokazioa areagotu», esan du Andres Urrutia euskaltzainburuak.

Temas

Recibe nuestras newsletters en tu email

Apúntate