Diario Vasco

Bueltan da Labrit

Bueltan da Labrit
/ MICHELENA
  • Bederatzi kantu goxo eta dantzagarri bildu ditu ‘Zortzi’ izeneko disko berrian

Gazte batzuk ez dira gogoratuko, baina 2000. hamarkada hasieran izan zen Labrit izeneko abeslari bat, bi disko plazaratu zituena, bata 2000. urtean, bestea 2001ean, biak ala biak pop estilokoak. Gero ama izan zen eta jendaurreko kantagintzari utzi egin zion erabat, baina orain berriz ere bueltan da, besapean ‘Zortzi’ (Baga Biga) diskoa duela. Oso desberdina itzuli da: programazioz beteriko kantu goxo eta dantzagarriak proposatzen ditu orain.

Labrit Zabala Kasasola kantariak (Usurbil, 1978) bi urte eman zituen Bide Ertzean taldean, harik eta 22 urterekin bakarkako ibilbidea hasi zuen arte. Bere ama Amaia Kasasolak (Haizea, Mandaeuli…) 80ko hamarkadan egindako urratsei jarraitu zizkien. Pop garbiko bi disko egin zituen: ‘Paradisua’ (Oihuka, 2000) eta ‘Nori egin so!’ (Oihuka, 2001).

Oraingo disko berrirako, Nacho Ferrer musika elektronikoko ekoizlearekin elkartu da Labrit. Baga Biga diskoetxearen arabera, «programazioz betetako disko alai eta dantzagarria egin du, ahots zirraragarriarekin nahastuta». Entzuleak «elektronikaren argudioak, ‘chill out’ soinuaren baretasuna, ahotsen melodien erakargarritasuna eta armonien plazera» aurkituko ditu bertan.

«Ama izan nintzenean, garbi ikusi nuen kantagintza utzi behar nuela. Umeak hezteko denbora asko behar da eta.Baina inoiz ez nuen utzi sorkuntza mundua. Eta fedea eta barreneko inozentzia ez nituen galdu», esan zuen atzoko aurkezpenean. 13 urteko semea eta 8ko alaba ditu, eta haiekin batera makina bat aldiz abestu omen du diskoan datorren azken alea, ‘Amaren musua’ delakoa.

Zuzenekoetan bikote formatuan plazaratuko da, Julen Apezetxea perkusio joleak lagunduta. Eta baliteke Labritek pianoa jotzea.

Temas

Recibe nuestras newsletters en tu email

Apúntate