Diario Vasco

EHUko Fantasiazko Ipuin Laburren Lehiaketara lanak aurkezteko epea zabalik

  • Edonork har dezake parte Arabako campuseko Errektoreordetzak antolatzen duen lehiaketan, lana azaroaren 18a baino lehenago bidaltzen badu

Euskal Herriko Unibertsitateko (EHU) Arabako campuseko Errektoreordetzak Fantasiazko Ipuin Laburren XXIV. Unibertsitate Lehiaketan parte hartzeko lanak aurkezteko epea ireki du, eta azaroaren 18an bukatuko da. Lehiaketaren xedea sorkuntza artistikoa eta literarioa sustatzea eta saritzea da, EHUk jakinarazi duenez.

Lehiaketa irekia da parte hartu nahi duen ororentzat. Argitaratu gabeko testu original bat aurkeztu beharko da, euskaraz edo gaztelaniaz. Aurkeztutako ipuinen artean, onenak 800 euroko saria lortuko du. Saritutako lana EHUrena izango da eta, ondoren, azken edizioetako saridunen bilduma argitaratuko du, liburu batean.

Sariak irabazi ahal izateko, gai fantastiko bat hizpide izango duen ipuin labur bat aurkeztu beharko da; gehienez hamar folio izan ahalko ditu, alde bakarretik mekanografiatuta eta espazio bikoitzarekin. Epaimahaia Arabako campuseko zenbait irakaslek eta literatura arloko ospe handiko hainbat pertsonek osatuko dute, eta saria eman gabe utz dezakete.

Testuak aurkezteko epea azaroaren 18an bukatuko da. Lanak izengoiti batekin bidali beharko dira EHUko Arabako campuseko Errektoreordetzako Kultur Hedakuntzako Zerbitzura. Testuarekin batera, gutunazal itxi batean, egilearen izena, NAN zenbakia, telefonoa eta erabilitako izengoitia adieraziko dira. Kanpoko aldean 'Fantasiazko Ipuin Laburren XXIV. Unibertsitate-Lehiaketarako' idatzi beharko da. Epaimahaiaren erabakia abenduaren 19an jakinaraziko da.

Temas

Recibe nuestras newsletters en tu email

Apúntate