Diario Vasco

Ekaitz Goienetxea bermeotarrari eman diote Igartza saria

Ekaitz Goienetxea.
Ekaitz Goienetxea. / MIKEL FRAILE
  • Heroinak 80ko hamarkadan eragin zituen kalteak islatuko ditu eleberriak, baina egungo begiradatik

Ekaitz Goienetxea bermeotarrak irabazi du hemeretzigarren Igartza saria. Heroinak 80ko hamarkadan Bizkaiko herri batean eragin zituen kalteak islatuko ditu eleberriak, baina egungo begiradatik. Orain gazte honek urtea izango du ‘Karramarroa trostan’ izenburuko liburua taxutzeko, eta Elkar etxeak 2018an emango du argitara.

CAF enpresak eta Beasaingo Udalak antolatutako beka da hau, idazle edo idazlegai gazteei eskaintzen zaiena. Deialdi honetan, aurrekoetan baino lagun gutxiagoren eskaerak jaso dira, bederatzi guztira, ezaugarri hauekin: bost gizonezko eta lau emakume, sei bizkaitar eta hiru giputz. Ana Jakak, Igor Estankonak eta Peru Magdalenak osatu dute epaimahaia.

Goienetxea 1982an jaioa da, Miarritzen. Bermeon bizi da eta bertan egiten du lan, Talako Kantinan tabernari eta kultur programatzaile. Gabriel Aresti ipuin sariketa irabazitakoa da eta Eslovenian egonaldi bat egina, ‘Beste hitzak’ programarekin. Idazten ari den liburu hau izango du lehen obra luzea.

Goienetxeak honela azaldu du bere istorioa: «Heroinak belaunaldi oso bat zulora eroan zueneko sasoia du kontagai, kostaldeko herri batean, gaurtik begiratuta. Protagonista neska gazte bat da, bere gurasoak jonki ohiak dituena eta, haurdun dagoelarik, abortatzeko erabakia hartu duena. Etxean bertan bizi izandakoak kontatzeko inolako lotsarik ez du neska honek, bere herrian gaia tabua izan arren. Taberna batean lan egiten du eta horri esker hainbat pertsonaia ezagutuko ditugu, garai haiekin lotura bat edo beste dutenak, eta guztien artean orduko gizartearen hainbat adar eta korapilo ezagutuko ditugu. Sasoi hartako gozamenak eta beldurrak, deskubrimenduak eta etsipenak, pozak eta minak».