Diario Vasco

Dantza-maratoia Gipuzkoako dantzari onenekin

Pasaian egin ohi den 'Soinu Zahar Txapelketa'
Pasaian egin ohi den 'Soinu Zahar Txapelketa'
  • 'Soinu zahar' guztiak, hogeita lauak, erakutsiko dira lehenbiziko aldiz Donostian larunbat honetan

‘Soinu zaharretatik dantzara’ ikuskizuna egingo da larunbat honetan Donostiako Konstituzio Enparanatzan, arratsaldeko 19:00etan hasita, Euskal Jaien barruan. Hainbat dantzarik hartuko dute parte, aldamenean Donostiako Udal Txistularien Taldea ariko delarik. Erakustaldi hau izango da Juan Ignazio Iztuetak jasotako soinu zahar guztiak –hogeita lauak– jarraian dantzatuko diren lehenengo aldia.

Besteak beste, Lezo, Villabona, Legazpi, Oiartzun, Beasain, Asteasu, Legazpi, Lizartza, Pasaia, Elgoibar, Berastegi eta Tolosako taldeetako dantzari onentsuenak ariko dira lanean. Gehienetan beren herrietako dantza-jantziak ekarriko dituzte hiriburura.

‘Soinu zaharrak’ izenez ezagutzen dira, Gipuzkoako dantzen alorrean, XVIII. mendearen amaieran ia galdutzat ematen ziren eta Juan Ignazio Iztuetak bere «Gipuzkoako dantza gogoangarrien kondaira edo historia» liburuan jaso zituen neurri bereziko batzuk.

Iztuetaren ahalegina izan zen ia galdua eta sakabanatua zegoen dantza tankera baten kondarrak jasotzea, biltzea eta sistematizatzea. Bere lanaren fidagarritasuna ontzat ematen dute ailegatu zaizkigun beste testigantza partzial batzuk.

Iztuetaren bilduman, bestelakoez gainera, bi dantza jenero nagusi aurkezten dira, biak atletikoak, benetako hezkuntza fisiko ona eskatzen dutenak: Zortzikoak eta Soinu zaharrak. Lehendabizikoak neurri finkoetako esaldiek osatzen dituzte, zortzi konpas edo puntukoak beti. Soinu zaharretan, aldiz, esaldiek ez dute neurri jakinik, bakoitza luzera desberdinetako esaldiez osatua dago.

Dantzatu beharreko musikaren neurriak ez dira behin eta berriz errepikatzen, asko aldatzen baizik eta dantzatu ahal izateko ongi ezagutu behar da aurretik bakoitza. Horregatik dio Iztuetak bien arteko aldea azpimarratzen: «Zortziko bat bakarra dantzatzen dakienak, dantzatu ditzake milloika (...). Baña soñu zar bat jakiñagatik ezin dantza dezake bestea, berriro ikasi gabetanik».

Gipuzkoako Dantzarien Biltzarrak koordinatu ditu dantzarien entseguak, eta ordu eta erdiko ikuskizuna izatea espero da.

Temas