Diario Vasco

Idazle eta ilustratzaile sarituak Iruñean

Horrelako artista taldea ez da egunero ikusten. Haiekin batera, Patxi Baztarrika eta Koldo Tellitu.
Horrelako artista taldea ez da egunero ikusten. Haiekin batera, Patxi Baztarrika eta Koldo Tellitu.
  • Ikastoletako haurrek JUUL hauteskunde literarioen bitartez emandako sariak jasotzera hurbildu zen Planetariora sortzaile talde zabala

JUUL literatur sariak ez dira nolanahikoak. Berezitasun ugari dituzte: haur eta gazte literaturakoak dira; euskarazko idazlanei eta horiek aberastu dituzten ilustrazioei ematen zaizkie, eta irakurleak dira epaile: ikastoletako haur eta gaztetxoak, alegia. Idazle eta ilustratzaileek estimu handita dituzte, eta pixuzko arrazoia behar dute horiek jasotzera ez joateko... Aurtengo edizioko sari banaketa atzo egin zen Iruñeko Planetarioan, eta han izan ziren irabazle gehienak. Argazkian ikus daitekeen bezala, Toti Martinez de Lezeak, Pello Añorgak, Jokin Mitxelenak, Eider Eibarrek, Jon Anduezak, Jasone Osorok, Jon Arretxek, Unai Elorriagak edota Juan Luis Landak ez zuten huts egin. Denek jaso zuten JUUL pertsonaia irudikatzen duen eskulturatxoa. Ilustratzaile eta idazle frandriar batek sortutako haurra da JUUL, sari ugari jaso dituen ipuin bateko protagonista. Sortzaile sarituekin batera izan ziren. besteak beste, Ikastolen Elkarteko lehendakari Koldo Tellitu eta, ekimena diruz laguntzen duen Eusko Jaurlaritza ordezkatzen, Patxi Baztarrika Hizkuntza Politikarako sailburuordea. Bertan ziren halaber Baztan Ikastolako Elena Zabaleta eta Nafarroako Ikastolen Elkarteko Pello Irujo.

Hiru urteko haurretatik 16ko gaztetxoetara, adinaren arabera sailkatutako bost kategoriatan ematen dira sariak, hiru sari kategoria bakoitzeko. Ilustratzaileei dagokienez, denak batera lehiatzen dira, eta bost sari ematen dira horien artean. Sariak esleitzeko modua ezin da demokratikoagoa eta gardenagoa izan: hauteskundeak egiten dituzte ikastoletako ikasleek, apirilaren 23aren bueltan, Liburuaren Nazioarteko Egunarekin bat eginik. Ekimenaren helburu nagusia irakurzaletasuna sustatzea bada ere, neska-mutikoak parte-hartze mota horretara gerturatzea ere badago xedeen artean.

Aurtengo edizioa 17. izan da. 49 ikastolak hartu dute parte hauteskundeetan, eta 25.500 boto eman dituzte irakurleek. Bozka gehien jasotzen dituztenek lortzen dituzte alegia sariak.

Dena dela, ikastola bakoitzak irakurzaletasuna bultzatzeko duen planaren barruan hauteskundeak azken urratsa baino ez dira. Nafarroako Ikastolen Elkarteak haur eta gazteentzako urtero antolatzen duen JUUL kanpaina ikasturtean zehar gelan, etxean, ikastolan eta herrian eta irakurketaren zaletasuna bultzatzeko lantzen diren beste hainbat jardueraz osatuta dago.

Temas