Oreka TX eta Munduko Beat ariko dira Txalaparta Festan

Munduko Beat talde madrildarraren kontzertuak irekiko du aurtengo txalapartarien topaketa. Txalaparta, perkusio kubatarra, musika elektronikoa eta flauta trabesera nahasten dituen formazio honekin hasiera aparta emango zaio ttakunaren festari. Biteri Kulturetxean izango da, 19:30etan.

Larunbatean, egun beteko egitaraua jabetuko da kaleaz. Eguerdian Txalaparta Erromeria eta herri bazkaria egingo dira. Arratsaldeko 17:00etan hasiko da ekitaldi nagusia, luxuzko euskal txalapartarien partaidetzaz: Gipuzkoako Oreka TX, Nafarroako Hutsun, Arabako Harresian Zulo, Bizkaiako Zukut, Madrileko Munduko Beat eta Hernaniko eskolako Ttakun Ttan Ttakun. Egun osoan zehar txalaparta saio libreak jo eta ikusi ahal izango dira, eta gauean, 23:00etatik aurrera, Txalaparta party aparta, Dj. Barrurekin.