Donostiaren memoria feminista ikertzeko beka

Naiara Sampedro Berdintasun zinegotziak beka honen garrantzia azpimarratu du. "Beka honen helburua da emakumeek eta mugimendu feministak hiriari egindako ekarpenak ezagutzea, horretan sakontzea eta aitortzea. Azken batean, itzalean egon dena argitara eman nahi dugu, ezkutuan egon dena begibistan jarriz, uste dugulako berdintasunaren bidean gure aurrekariek ere lan ugari egin zutela. Beka hau, beraz, zalantzarik gabe, beste urrats bat izango da berdintasunean aurrera egiteko", esan du.

Donostiako Udalak III. Berdintasun Plana onartu zuen 2014ko apirilaren 25ean. Plan hartan, nahitaezko lan ildotzat hartu zuen emakumeen parte hartze soziopolitiko eta ekonomikoa sustatzea, eta, zehazki, 5.2 puntuan, konpromiso hau hartu zuen: "Emakumeek hiriari eginiko ekarpenak berreskuratuko duten proiektuak bultzatzea".

Testuinguru horretan jarri zen abian ikerketaren ildoa. Berdintasun Atalak, jadanik, baditu horren bi aurrekari: 2000. urtean "Emakume donostiarrak XIX. eta XX. mendeetan" liburua argitaratu zuen, eta 2013an lehenengo ikerketa beka antolatu zuen, emakumeak danborradan izan duten papera aztertzeko -"Emeki-emeki berdintasunezko danborradarantz" izenburuarekin argitaratu dira lan horren emaitzak-.

Aurreproiektuak Berdintasun Bulegoan aurkeztu ahal izango dira. Ikerketa lana euskaraz eta gaztelaniaz aurkeztu beharko da, eta norbanakoek nahiz ikerketa taldeek aurkeztu ahal izango dituzte proposamenak.