Euskal olerki antologia italieraz sarean eskuragarri, Danilo Maneraren eskutik

Danilo Manera Milango Unibertsitateko irakaslearen eskutik itzulitako antologia da, Unibertsitate berak kudeatzen duen 'Tintas' aldizkarian. Etxepare Euskal Institutuaren poesia antologia eta euskal olerkigintzan aztarna utzi duten eta uzten ari diren autore ezberdinen olerkiak oinarri hartuta, italierazko itzulpenak sortu ditu Manerak. Ez da, gainera, euskaratik itzultzen duen lehen aldia: B. Etxepareren Linguae Vasconum Primitiae (Euskaltzaindia, Bilbo, 1995); X. Kintanarekin batera prestatutako In Forma di Parole (1987); edota X. Kintanaren Euskararen eta euskal literaturaren ibilbidea (Erroma, 2001) ere itzuli ditu, besteak beste.

Publikazio monografiko honen epilogoan, Etxepare Euskal Institutuko Euskararen Promozio eta Difusiorako zuzendari den Mari Jose Olaziregiri eskerra jaso du itzultzaileak, beste hainbaten artean.