121.631 bisitari izan ditu Albaolak ateak ireki zituenetik

Ligazoien azken ilara prestatzea tokatzen da eraikuntzaren fase honetan, / USOZ

2014ko uztailaz geroztik bertatik bertara ikus daitekeen San Juan baleontziaren eraikuntza prozesuak erdia pasa du

Hainbat urtez landutako proiektua gauzaturik, 2014ko uztailean lortu zuen azkenean Albaola Elkarteak izen bereko Itsas Kultur Faktoria zabaltzea Pasaian. Eta badute zer ospatua egunotan, azken hiru urteotan 121.631 bisitari izan baitira bertan.

Honela laburtu du Albaolak ohar baten bidez proiektuaren ibilbidea: "Albaola Elkartea 1997. urtean sortu zen Estatu Batuetan, 'Ameriketatik' traineruaren eraikuntzarekin, irabazi asmorik gabeko kultur elkarte bezala, euskal itsas ondarea eta kultura biziberritzeko helburuarekin. 2000. urtean Ontziola izeneko Itsasontzi Tradizionalen Eraikuntza eta Ikerkuntza Zentroa ireki zuen Pasai Donibanen eta, 2010. urtean, Ondartxora aldatu zuen egoitza, Itsas Kulturaren Zentroa zabalduz. Orain dela hiru urte, 2014. uztailean, leku berean Albaola Itsas Kultur Faktoria izenez zabaldu zituen ateak etapa berri bati hasera emanez, orain ezagutzen dugun moduan eta bisitagarri, San Juan baleontziaren gila ezarrita eta ikusgai zegoelarik".

Izan ere, San Juan baleontziaren eraikuntza prozesuaren zuzeneko jarraipena eta baleontziaren historia eta garaia azaltzen dituen museoa dira Faktoriaren eskaintza osatzen duten elementu nagusiak. Duela hiru urte San Juan baleontziaren eraikuntzari hasiera eman zitzaionetik, ontziak gaur egun bere eraikuntza prozesuaren erdia pasa du eta ligazoien azken ilara prestatzen ari dira orain.

Urte hauetan bisitari kopurua etengabe haziz joan da, guztira 121.631 bisitari izan dira Albaolan eta, Gipuzkoako 3. museorik bisitatuena izatea lortu du bere lehenengo urtetik. Kontutan hartzekoa da horren eraginez izan duen eraginez izan duen inpaktu sozio-ekonomiko positiboa.

Erreferentziazko gunea

Balantzea egiteko orduan, oso kontuan dute San Juan baleontziaren proiektua "erreferentziala" bihurtu dela itsas kulturaren eta ondarearen eremuan mundu osoan. "Proiektuaren planteamendu bereziak eta Faktoriaren ereduak interes handia piztu dute nazioartean eta asko dira urte hauetan mundu mailan emandako hitzaldiak eta aurkezpenak (Albaola Itsas Kultur Faktoria, Pasaia eta Euskal Herria munduan kokatuz). Horren harira aipatzekoa da UNESCOk San Juan baleontziaren eraikuntzari emandako babesa, proiektuak duen oinarri eta zorroztasun zientifikoa dela eta", gehitu dute.

Mundu osoko hedabideetan izan du halaber oihartzuna Pasaiako badiako esperientzia paregabeak. Beste askoren artean, Anthony Bourdain sukaldari estatubatuarraren telebista saio ezaguna edo Frantziako telebistako Thalassa itsas saioak eginiko erreportaje luzeak aipatu daitezke. Ugarienak Espainiar eta Frantziar komunikabideak izanik ere, Japonia, Alemania, Holanda, Korea, Estatu Batuak eta hainbat lekutakoen elkarrizketa, grabaketa eta erreportaje eskaerak ugaritu egin dira. Inpaktu mediatikoaren balorazioa urtero haziz joan da, eta iazkoa 1.540.000 euro pasakoa izan da.

Alor kulturalean ere Faktoria erreferentziazko kultur plaza bihurtu da Pasaiako badian. Hainbat eta hainbat ekintza kultural egin dira bertan: musika emanaldi, antzerki obra, hitzaldi, aurkezpen, prentsaurreko, grabaketa, marka eta taldeen eszenatoki eta abar.

Halaber, hiru urteotan hainbat enpresa eta erakundek -publiko naiz pribatuk- egin dute bat babesle bezala Faktoriako proiektuarekin. Horiek guztiak eta bisitariak dira finantzazio iturri ezinbestekoak. Albaolak, denei eskerrak emateaz gain, gogoratu du bisitari, boluntario, erakunde eta enpresa horiek gabe "ezinezkoa izango litzatekelako orain arteko ibilbide oparoa osatzea".

Faktoria oraindik ezagutzen ez dutenek, edota errepikatu nahi dutenek, udako ordutegian dute zabalik asteartetik igandera: 10:00etatik 14:00etara goizean eta 15:00etatik 19:00etara arratsaldean.

Temas

Euskera

Fotos

Vídeos