Oikiako Eskola Txikien Festan Zokormazoekin ordainduko da

S.U. ZUMAIA.

Bihar, Gipuzkoako Eskola Txikien 31. Festa ospatuko da Oikian. Goizeko 10:30etik arratsaldeko 20:00ak arte, ekin-tza ugari izango dira.10:30ean harrera ekitaldia ospatuko da eta I-tziar Garciarena Oikiako Eskolako zuzendariarekin batera Cristina Uriarte Eusko Jaurlaritzako Hezkuntza Sailburua; Markel Olano Gipuzkoako ahaldun nagusia; eta Oier Korta Zumaiako alkatea izango dira ekitaldian.

Festako antolatzaileek azaldu dutenez, festaguneko postuek ez dute diru normalarekin funtzionatuko, erositako txartel bereziekin baizik. «Jendeak 'zokormazoak' erabiliko ditu erosketak egiteko. Zokormazoa, egurrezko mailu handia da, baserriko hainbat lanerako erabilia; pertsona trakets, zabar edo ezjakinari ere deitu izan zaio zokormazo. Oikiako traineruak Zarauzko bandera irabazi zuenean ateratako bertsoetan egiten da 'oikiako zokormazoen' aipamena, eta guk berreskuratu egin dugu», azaldu dute.

Eskola Txikien Festa handia aprobetxatuz, Ibilbide berezi bat ere prestatu dute. «Mantziorko zubia 500 urte baino gehiago dituen zubi ikusgarria da eta Oikiako plazatik 600 metrora dago, Urola ibaiaren gainean. Plazatik bertarako ibilbidea seinalizatuta jarriko da, bisitariek ikustera joan nahi badute bidea erraz egin dezaten», diote. Haurren erropetan erabili den logotipoan ere zubi hau ageri da irribarretsu.

Bestalde, Lurraldebusek autobus txikiarekin zerbitzu berezia jarriko du orduero, egun guztian zehar Zumaiatik Oikiara joan-etorriak egiteko. Informazio gehiago www.lurraldebus.eus atarian ('Albisteak' atalean).

Contenido Patrocinado

Fotos

Vídeos