Jardunaldirik onena Zumaiako txirrindularientzat

DV ZUMAIA.

Viveros San Antongo txirrindularientzat pistako seigarren jardunaldia orain arteko onena izan da, «lasterketan nabarmendu egin ziren beste behin baina oraingoan, emaitzek ere jaso dute lan on hori», adierazi du Arritxu Iribar kazetariak.

Kadete mailan lehenengoz onenen txandan korritu zuten taldeko lau kideek, eta onenen artean, maila oso ona eman zuten guztiek. «Puntuaketan ikusgarria izan zen Aitor Agirreren lasterketa; garaipenetik puntu batera sailkatu zen hirugarren tokian», dio. Kimetz Etxabek bederatzigarren amaitu zuen, roman Zabaleta 12. izan zen eta Mikel Mancisidor 23. Kadete mailako 28 txirrindularirik onenak batera lehiatu ziren, B mailan beste horrenbeste txirrindulari lehiatuz.

«Mancisidorrentzat lehenengo aldia zen onenen artean eta nabarmendu behar da B mailako lasterketetan baino askoz ere hobeto ibili zela onenen artean nahiz eta zailagoa izan. Kimetz Etxabek ohiko maila eman zuen eta Roman Zabaleta argi ibili zen, indarrak bukaerarako gordeaz. Bakarrik saiatu zen, baina ez zuen etekinik atera», adierazi du kazetariak.

«Aitor Agirreren lasterketa itzela izan zen, erdia bakarrik egin baitzuen ihesita; paliza handia hartu arren, indarrak ondo neurtu zituen hustu gabe, eta kemena izan zuen behin pelotoian irentsita buruan borrokan segitzeko. Lortutako puntuekin sailkapen nagusian urrats handia eman du».

Scratch

Scratchean Kimetz Etxabek ausart jokatu zuen eta ordaindu bukaeran. Roman Zabaletak 13. sailkatu zen, Aitor Agirre 17., Mikel Mancisisdor 20. Eta Kimetz Etxabe 22. Hiru jardunaldi faltan, Viveros San Antongo txirrindulariak, lau txirrindularitik hiruk Top 15ean dira: Kimetz Etxabe 8. da, Aitor Agirre 9., Roman Zabaleta 14. eta Mikel Mancisidor 31.a Parte hartzaileen marka guztiak ontzen ari dira aurten, guztira kadeteetan 79 txirrindulari daude sailkapenean.

Junior mailan B lasterketetan leihatu zen Antton Tolosa zumaiarrak aurreko asteburua eta oso lasterketa politak egin zituen. 11. sailkatu zen scratchean eta beste hainbeste puntuaketan. Karrera honetan gainera ihesaldi ona ere harrapatu zuen. Sailkapen nagusian 32. Tokian da Viveros San Antongo junior bakarra.

Guztira 57 txirrindulari daude. Viveros San Antongo txirrindulariek atsedenik ez dute, gaur bertan urtea agurtzeko beste saio bat izango dute Antonio Elortza belodromoan 15.30etik aurrera. Gaur Tempo eta puntuaketa lasterketak jokatuko dira.

Contenido Patrocinado

Fotos

Vídeos