Hiru txirrindulari Euskadiko txapelketara

Euskadiko txapelketan parte hartuko duten txirrindulariak. /  VSA
Euskadiko txapelketan parte hartuko duten txirrindulariak. / VSA

Viveros San Antongo Aritz Eizagirre, Garazi Bergara eta Heiko Mateos infantil mailan arituko dira

DV ZUMAIA.

Sasoiko eta gogotsu joango dira igandean Arrasaten jokatuko den infantil mailako Euskadiko txapelketara Viveros San Antongo hiru txirrindulariak: Aritz Eizagirre, Heiko Mateos eta Garazi Bergara.

Aurreko igandean Irunen izan zuten lasterketa eta Heiko Mateosek lasterketa bikaina egin zuen, ihesaldia harrapatuz. Aritz Eizagirrek 23. bukatu zuen eta Garazi Bergara hirugarrena izan zen, nahiz eta lasterketa guztia buruan egin, «azkenean bere lanaz ederki aprobetxatu ziren beste batzuek»; azaldu du Zumaiako Txirrindulari elkarteko kide Arritxu Iribarrek.

Alebinetan, Asier Aizpuruak erorikoa izan zuen eta ez zuen buka-tzerik izan. Beste taldekideek oso maila ona eman zuten: 4. Yuri Urbieta, 7. Anuk Gogenola, 8. Danel Beristain, 18. Lizar Tolosa, 21. Manex Beristain, 23. Beñat Sainz, 31. Zuhaitz Valero, 37. Hedoi Mateos. «Oso maila onean heltzen ari dira denboraldiko amaierara», adierazi du Iribarrek. Nesketan 11. izan zen Ihintza Gartziarena eta 12. Araitz Aldazabal.

Asteburu honetan ez dute alebinek lasterketarik izango. Kadeteek Eibarren izan zuten lasterketa igandean eta «pena bakarra ihesaldian ez zela Viveros San Antongo txirrindularirik sartu, bestela karrera bikaina egin zuten eta pelotoi burutik aldendu ziren une bakarrean sortu zen sei txirirndulariz osatutako ihesaldi ona». Helmugan 14. sailkatu zen Ander Altuna, 20. Kimetz Etxabe, 21. Roman Zabaleta, 37. Aitor Agirre eta 71 Mikel Mancisidor. 150 txirrindulari izan ziren irteeran eta 104k bukatu zuten, nabarmentzekoa abiadura: 40,44km/h, 63 kmko ibilbidean. Taldeka Viveros San Anton seigarren sailkatu zen. Asteburuan bi lasterketa korrituko dituzte, bihar goizean Lazkaon eta igande arratsaldean Ataunen. «Denboraldi honetan lehenengoz egin beharko diete aurre bi lasterketei asteburu berean, baina Viveros San Antongo txirrindulariak prestatuta daude ondo erantzuteko», dio Iribarrek.

Bestalde, bihar berriz Antton Tolosak astebeteko atsedenaren ondoren Zarautzen izango du lasterketa.

Contenido Patrocinado

Fotos

Vídeos