Dinastia Etxabeko azken laurdenetako azken jardunaldia, 11n

DV ZUMAIA.

Dinastia Etxabe txapelketako final laurdenetako hirugarren jardunaldia jokatu zen, astelehenean Aitzurin. Hauek izan ziren emaitzak: Iriarte-Balerdi 22/ 9 Larrañaga-Cordon eta Salaberria-Aizpuru 12/ 22 Alberdi-Garmendia.

Gazte-jubeniletan garbi nagusitu ziren Iriarte eta Balerdi. 2-0, 2-2 eta 3-3 berdintsu hasi ondoren 6-3, 9-4 eta 12-5 abantaila hartu eta 19-8 ihes eginik, 22-9ko emaitzarekin irabazi zieten Larrañaga eta Cordoni. «Iriarte Larrañaga baino gehiago baina baita ere Balerdi Cordonen aldean», adierazi du Jexux Iribar 'Olalde'-k. «Honek (Cordon) partida orekatzeko atzekoadroetan nagusitzea ez lortzeaz gain pilota dezente galdu zituen». Lau tanto egin zituen Larrañaga oikiarrak eta «defentsan ondo, sake errestoan ere atzelariari airez pilota txarrak kenduaz nahiz eta bi pilota galdu. Bere pilotari izate dohainak erakutsi zituen nolanahi ere eta maila honetako partidak jokatzera ohitua ez dagoen 16 urteko mutiko batentzat ez dago gaizki», azaldu du Olaldek.

Garaileen aldetik, «Gorka Iriarte azpeitiarra gustatu zitzaigun, aurrelari efektiboa, ez du asko errematatzen baina egiten duenean ondo, bizi eta norabide onean bidaliaz pilota». Aurkariaren opariak ondo aprobetxatu zituen eta min egin zuen aurrekoadroetan, bederatzi tanto eginaz. «Manex Balerdi antzuolarrak ondo lagundu zion, hasieran pilotara jartzea kostatu zitzaion pixka bat eta hiru pilota galdu ere bai baina hortik aurrera ondo, nahiz eta hobeto egiteko gaitasuna baduen».

23 urtez azpiko partidari dagokionez, «langile onenak ere erremintarik gabe ezin lanik egin eta hauxe Aitzurin ikusitakoaz atera genezakeen ondorio nagusiena. Salaberria lagun, 11-7, lan erdiak egin eta markagailuan ordura arteko alderik handiena hartutako garaian, Aizpuruk erdizka ekarritako esku eskubia erabat hautsi eta pilotari eman ezinez benetako kalbarioa pasa beharra izan zuen Alberdi eta Garmendia 22. tantora iritsi ziren arte. Pena bat lau pilotariak jokatzen ari ziren maila altuko partida une batetik bestera horrela hautsi izana eta ordura arte ematen ari ziren ikuskizun bikaina erabat bertan behera erori izana baita ere», dio Olaldek.

Lan ona finalaurrekoetarako txartela lortzeko: «Alberdi azpeitiarrak erasoan ere ausart baina defentsan ezin hobeto pilota oso zailak jasoaz. Beñat Garmendia berriz zortzirenetako partidako ildo berean, ezker eskubiz pilota dantzatu eta aurrelariaren jokoa ondo babestuz, pilota onak eskatu eta txarrak jasotzeko beti prest egonik atzean».

Ostiralean, hilak 11n, azken laurdenetako azken jardunaldia jokatuko da, 22:00etatik aurrera. Gazte jubeniletan: Osa-Gaskue/Agirremalloa-Etxeberria. 23 urtez azpikoetan: Larrañaga-Aranguren/ Zubizarreta-Irurita.

Fotos

Vídeos