1.041 sinadura bildu ditu Txiribuelta elkarteak

DV ZUMAIA.

Txiribuelta elkarteak 0-6 umeen eta gurasoen lokala egitearen aldeko sinadura bilketa itxi-tzat eman zuen aurreko astelehenean. «Bi astez aritu gara atxikimenduak lortzen, guraso batzuena baino, eskaera herritar askorena dela agerian uzteko asmoz. Emaitza argigarria izan da: 18 urtetik gorako 1.041 lagunek bere egin dute Zumaian 0-6 umeen eta gurasoen lokalaren beharra», azaldu dute.

Txiribuelta elkarteak azken hiru urteetan bultzatutako ideia izan da 0-6 ume eta gurasoentzako lokala sortzea. Zumaiako 66 familiak eta 105 umek osatutako elkartea da Txiribuelta, baina zenbait familiaren beharrak asetzeko baino harago doan eskaera da. «Jakitun ginen ume txikienentzat egokitutako leku bat, gurasoentzako topagune ireki bat, edukitzea askok eta askok begi onez ikusten duen proiektua dela. Herriari, oro har, mesede handia egingo diolako, umeak hazteko leku hobea egingo duelako, besteak beste», diote.

Laster Udalaren esku utziko dituzte sinadura guztiak eta horrekin batera lokalaren gaiari berriz heltzeko eskatuko diote, herrian dauden aukerak aztertu eta denontzat egokiena den espazioa sortzeari ekiteko asmoz. «Mila-mila esker zuen sinaduraren bitartez lokalari bultzada eman diozuen 1.041 lagunei», gaineratu dute.

Contenido Patrocinado

Fotos

Vídeos