Zarauzko Zikloturista Elkartean bazkide egiteko epea zabalik

Hainbat ekitalditan parte hartzen dute urtean zehar ZZEko bazkideek. /  ZARAUZKO ZIKLOTURISTA ELKARTEA
Hainbat ekitalditan parte hartzen dute urtean zehar ZZEko bazkideek. / ZARAUZKO ZIKLOTURISTA ELKARTEA

ZZEk egun 100 bazkide ditu, adin guztietako txirrindulariekin

ANTXON ETXEBERRIA ZARAUTZ.

Zarauzko Zikloturista Elkarteak aste honetan ireki du 2018rako bazkidetza eta lizentziak berritu edota berriak eskatzeko epea. Interesatuak Zarauzko kiroldegiko bulegotik pasa daitezke, edota Zarauzko Ciclos Eizagirre, Ciclos Ibaiondo eta Iraeta Bizikletak dendetan eskuragarri dauden inskripzio orriak bete. Berriei bertan emango zaizkie beharrezko xehetasun guztiak.

Elkartetik txirrindularitza gustukoa dutenei inskribatzeko animatzen diete, federatua egotea garrantzitsua dela uste baita, batez ere, istripu baten aurrean seguru baten babesa edukitzeko. Gainera, bazkide berri bakoitzari, elkartetik 25 eurotako bono bat oparituko zaio taldeko maillota eskuratzeko, izan ere zikloturista guztiek maillot berdina eramaten baitute.

Gaur egun, 100 bazkidek osatzen dute Zarauzko Zikloturista Elkartea, adin guztietako txirrindulariekin. Elkartetik emakumeen parte hartzea ere bultzatu nahi litzateke, euskal errepideetan bizikletaz geroz eta emakume gehiago ikusten den arren, oraindik gutxi direlako.

Bestetik, aditzera ematen dute martxotik irailera, igandero, bizikleta irteerak antolatzen dituztela Gipuzkoako herri ezberdinetara, horretarako Azkoitia, Getaria, Orio, Zestoa eta Zumaiako zikloturisten babesarekin antolakuntzan. Ibilbide motzekin hasten dira, baina asteak pasa ahala kilometro gehiago sartzen dituzte eta ibilbidea gogor-tzen joaten da. Ibilbide guzti hauetaz gain, maiatzean eta ekainean Pirinioetara, Nafarroa edota Errioxa aldera irteera bereziak antolatzen dituzte. Eta irailean, Zarauzko Udalarekin batera, herriko haurrentzako 'Txikien Eguna' antolatu ohi izaten dute, mobilitate astearen barne, bizikletaren erabilera bultzatu asmoz.

Zarautz Klasikoa

Baita ere, urtero egiten den bezala, Zarautz Klasikoa antolatuko da 2018ko maiatzaren 27an. 'Haimar Zubeldia Klasikoa' izena daraman ibilbideak 152 km-ko luzera izango du eta Urola Kosta eta Goierrin barrena burutuko du ibilbidea, Bidania, Larraitz, Mandubia eta Etumeta igoerak tarteko. Elkarteko txirrindulariez gain, Euskal Herriko, Espainiako eta Frantziako 600 zikloturisten parte-hartzea espero da. Izen ematea datorren urtearen haseran zabalduko da, kirolprobak.com orrialdean.

Contenido Patrocinado

Fotos

Vídeos