Zarauzko Udal Euskaltegiak bere eskaintza zabala aurkeztu berri du

Aurkezpena. Nekane Iribar eta Maite Egiguren, atzo. / ETXEBERRIA
Aurkezpena. Nekane Iribar eta Maite Egiguren, atzo. / ETXEBERRIA

Matrikula epea zabalik izango da hilaren 22a bitartean

ANTXON ETXEBERRIA ZARAUTZ.

Irailaren 22ra bitartean zabalik dago udal euskaltegiko matrikula epea. Joan den ikastaroan 272 ikasle egon ziren matrikulatuta eta aurtengorako ere zenbaki horietan egotea edo igotzea nahiko lukete. Ikastaroen aurkezpena atzo eguerdian egin zuten Iturribidea 28-30 helbidean kokatzen den udal euskaltegi bertan Maite Egiguren euskaltegiko zuzendariak eta Nekane Iribar, euskara zinegotziak.

Zarauzko udal euskaltegiak bide luzea egin du; dagoeneko 35 urte daramatza ikasleen esku beraien esperientzia jartzen. Baina Maitek zioen bezala, «berrikuntzetara ere zabalik gaude. HABEk 2015ean erabaki zuen helduen euskalduntzearen ikas prozesua gidatuko duen Curriculum berria ezartzea, eta gure euskaltegian ere horretara egoki-tzeko lanean ari gara, geure curriculuma osatzen. Bertan jasotzen da ikasle helduak euskara ikastean egin behar duen aurrerabidea, eta sei mailatan egituratzen da, Europako erreferentzia markoarekin bat etorriz - Oinarrizkoa A1 eta A2; aurreratua B1 eta B2 (hobeto ulertzeko, lehenengo eta bigarren perfilen baliokidea); eta aditua C1 (EGAren parekoa) eta C2 (4. hizkuntza eskakizuna edo 4.mailaren baliokidea)».

Garbi daukate, euskaltegiko irakaskuntzaren ardatza ikaslea dela, «eta gure metodologia hizkuntzaren ikuspegi komunikatiboan oinarritua dago, ekintza komunikatibotan definitua. Izan ere, hizkuntzarekin gauzak eginez eta egiteko ikasten baita euskara. Era berean gure inguruko ezaugarri eta egoera soziolinguistikora egokitua».

Aurtengo eskaintza

Aurtengo eskaintza, beti bezala, zabala da. Alde batetik, aurrez aurreko taldeak daude, eta horietan ikasleek egunean bi orduko eskolak izaten dituzte: oinarrizko mailetakoek, hau da, A1 eta A2koek astean lau egunetan azaldu behar izaten dute, astelehenetik ostegunera; eta B1, B2 eta C1ekoek astean hiru egunetan, astelehen, astearte eta ostegunetan, hain zuzen ere. Goiz, arratsalde eta gau parteko ordutegiak eskaintzen dituzte eta taldeak sor-tzen dira maila bakoitzeko 8 ikasle edo gehiago elkartzen badira.

Bestetik, autoikaskuntza eskain-tzen dute, etxetik ikasteko aukera ematen duen sistema. Etxean lan egiteko unitateak jartzeko euskaltegi birtual bat sortu dute, EuskaraOn, eta hortik jasotzen dituzte ikasleek materiala. Hala ere, euskaltegira azaldu behar izaten da. Oinarrizko mailako ikasleek astean tutoretza bat izaten dute, ordubetekoa, eta maila aurreratuagoetakoek hamabostean behin. Tutoretza eguna eta ordua ikaslearekin adosten du tutore bakoitzak. Horretaz gain, astero ordubete edo bi orduko min-tza-saioa ere izaten dute, taldean. Sistema honetako ikasle gehienak eskoletara etorri egiten dira, baina etorri ezin direnek tutoretza Skype bidez egiten dute.

Euskaltegiko ikasleek euskara agiriak lortzeko aukera ere izaten dute. A1, A2 eta B1eko ikasleek euskaltegian bertan urte osoko ebaluazio jarraituaren bitartez eta amaieran azterketa bat eginda, eta B2, C1 eta C2ekoek HABEk edo beste erakunderen batek antolatutako azterketetara aurkeztuta.

Hauxe da udal euskaltegiko eskaintza eta nahi duenak zabal-zabalik ditu ateak Iturribide kaleko 28an, 943131153 edo 943855084 zenbakietara deituta edo baita, euskaltegia@zarautz.eus helbide elektronikora idatzita ere. «Animatu zaitezte, zain izango gaituzue».

Más

Fotos

Vídeos