Urtetan, Sebastian Deunaren jaiak

Urteta auzoko Sebastian Deunaren jaietara urtero auzotar eta herritar asko inguratzen da.
/ETXEBERRIA
Urteta auzoko Sebastian Deunaren jaietara urtero auzotar eta herritar asko inguratzen da. / ETXEBERRIA

Auzora igotzeko autobus zerbitzu berezia izango da gaur eta bihar

ANTXON ETXEBERRIA ZARAUTZ.

Sebastian Deunaren jaiak ospatzen dira Urteta auzoan, bertako Neska Mutil Ardo-koek egitarau zabala prestatu dutelarik, auzotar eta herritarrak bertara hurbiltzera gonbidaturik. Horretarako, Udalak gaur eta bihar autobus zerbitzu berezia jarriko du.

Gaurko Sebastian Deunaren eguna, goizeko 10:30ean bertako ermitan ospatuko den meza nagusiarekin zabalduko da; ondoren, hamaiketakoa izango da auzo elkartean, Zarautz-trik-eko kideak alaituko dutelarik auzoa goiz guztian zehar.

Eguerdian, Neska Mutil Ardo-ko kideek omenaldi-bazkaria eskainiko diote auzoko adinduei. Eguna amaitzeko, gaueko 23:00etan erromeria iragartzen da Lesakako Elizagoien ahizpen eskutik.

Bihar, iSebastian Bigarrena, bezperan bezala, goizeko 10:30ean meza nagusia eta ondoren hamaiketakoa eskainiko da. Eguerdi partean, herri kirol festa antolatu da Izeta harri-jasotzaile eskolaren eskutik: Iñigo Eizagirre 'Eiza', Xabier Peñagarikano 'Erreusta', Mikel Lopetegi 'Urra' eta Xabat Olaizola arituko direlarik.

Goiza amaitzeko, sokatira desafioa, auzoko Neska Mutil Ardoaren eta ezkonduen artean. Goiz osoan zehar, Aratz eta Maria trikitilariek giroa alaitzen jardungo dute. Arratsaldean berriz,18:30ean hasita, Elustondo anai-arrebekin erromeria.

Jai egitarauak datorren ostiralean izango du jarraipena, bertso-afariarekin Andoni Egaña eta Iker Zubeldia bertsolariekin eta Julen Alonso eta Eneritz Aulestiak jotako doinuek alaituta, eta jarraian erromeria goizeko ordu txikiak arte.

Azkenik, larunbatean, 16:00etan hasita, Urtetako XVIII. Mus Txapelketa jokatuko da, izen-ematea bikoteko 20 eurotakoa izanik. Eta jai egitaraua amaitzeko, gauean kontzertuak, Hortzaika, eta Fan&Go taldeekin eta jarraian dj Munan jr.

Esan bezala, Urtetara igo eta jaisteko autobus zerbitzua izango da, gaur igotzeko 10:00etan eta jaisteko 13:00etan eta bihar, igotzeko 10:00etan 12:00etan eta jaisteko 14:00etan. Era berean, hilak 27an, igotzeko gaueko 22:00etan zerbitzua izango da eta jaisteko 2:00etan.

Irteera guztiak Maria Etxetxiki parean abiatuta izango dira, autobusak Araba kaletik jarraituz.

Argiztapen berria prest

Adierazi ere, Urtetako argiztapen berria prest dela. Zarauzko Udaleko Obra eta Zerbitzu sailetik garatzen ari den Aurrezpen Energetikorako plan bereziaren baitan, Urteta auzoan argiztapen sare berria jartzeko duela hilabete hasi ziren lanak amaitu dira. Iban San Martin, Obra eta Zerbitzu zinegotziak azaldu duenez, energetikoki eraginkorragoak diren luminarien ordezkapenerako partida bat bereizi da plan honetan, eta Urtetan egin diren lanak aurrekontu horren barruan burutu dira.

«Alde batetik, Urtetako Eliz-Mendi elkartearen aurreko espaloian eta ondoko plazan led teknologia bidezko luminaria berriak jarri ditugu. Orain arte argiztatu gabe zeuden espazioak dira eta bertako bizilagunek askotan helarazi digute hainbeste erabiltzen dituzten espazio hauek argiztatzeko dagoen beharra. Eta beste alde batetik, elkartearen kanpoan eta frontoi inguruan aurretik zauden luminaria guztiak led teknologia bidezko luminariengatik ordezkatu ditugu, argindar kontsumoa murrizteko», dio.

Hala, led luminaria bidezko argiztapen sare berri hau erabiliz eta erregulazio sistema automatiko baten bitartez, Udaletik kontsumoa gutxitzea espero dute. Lan hauek egiteko, Udalak, Eusko Jaurlaritzaren bidez, Urkomek sustatutako Landa Garapenaren Planak barne hartzen duen 23.552,40 euroko diru-laguntza jaso du.

Contenido Patrocinado

Fotos

Vídeos