Udal ordezkariek eskertu dute errefuxiatuen alde dabiltzanen lana

Zarauzko alkateak eta Kooperazio zinegotziak Hotz Zarautz eta Salvamento Maritimo Humanitarioko kideei errefuxiatuen alde egiten duten lana eskertu zieten.

Xabier Txurrukaren esanetan, «duela bi urte inguru elkartasun olatua sortu zen gure herrian. Hotz Zarautz jaio zen. Lan egiteko gogoz eta ilusioz errefuxiatuen krisiari erantzuteko sortu zen taldea eta ehunetik gora boluntario biltzen ditu gaur egun. Ekimen ugari burutu dituzte errefuxiatuei babesa adierazteko eta ahal duten guztian lagun-tzeko. Eskerrak eman nahi dizkizuegu. Erakusten duzuen borondatea eta lan egiteko gogoa eredugarria da oso».

«Errefuxiatuek kanpalekuetan bizi duten egoera lazgarria da eta Hotz Zarautz Chios, Greziako uhartean lanean dabilen Salvamento Maritimo Humanitarioko kideekin elkarlanean dabil. Harreman zuzena dute eta beraiek informatzen diete egoera nola dagoen. Horregatik, Zarauzko Udalak aurten Hotz Zarautzi 3.518 euro eman dizkio Salvamento Maritimo Humanitariok erreskateetarako materiala lor-tzeko», azpimarratu zuen.

Erreskate material hori Lifeline itsasontzirako da, Mediterraneoko uretan erreskateak egiteko. Dagoeneko 315 pertsona erreskatatu dituzte Libia inguruko uretatik. «Azken batean benetan inporta duenaz ari gara, bizitzaz. Zorionak beraz, Salvamento Maritimo Humanitariori egiten duzuen lanagatik, eta Hotz Zarautzi eskerrak eman nahi dizkiot beraien elkartasunari esker horrelako proiektuak gauzatu daitezkeelako», erantsi zuen amaitzeko.

Patxi Elolak bere aldetik zera esan zuen, «errefuxiatuek egin duten delitu bakarra leku horietan jaio izana da. Argi dugu lagundu egin behar diegula. ACNUR, Save the Children bezalako erakundeek ematen dituzten datuak beldurgarriak dira; 3 milioi errefuxiatu Turkian eta Siriatik ihes egindako 6 milioi pertsona».

«Siria ondoko herrialdeak errefuxiatuez gainezka daude eta Turkiako baldintzak oso kaskarrak dira. Gainera, Siriako gerrak ez du etenik eta harrapatuta dauden pertsonak ihes egiteko bideak bilatzen jarraituko dute. Itsasoak zeharkatzen».

«Gaur gurekin ditugun bi erakundeen lana balorean jarri nahi dugu. Zorionez, Hotz Zarautz eta Salvamento Marítimo Humanitario erakundeetan dauden boluntarioak gogor ari dira lanean. Elkartasun olatuak ere ez du etenik eta horrelako ekin-tzak babesten jarraituko dugu».

Contenido Patrocinado

Fotos

Vídeos