Helduentzako euskal dantza ikastaro berrirako izen-ematea zabalik dago

Euskal dantzen inguruko giroa nabarmena da gure herrian./ETXEBERRIA
Euskal dantzen inguruko giroa nabarmena da gure herrian. / ETXEBERRIA

Joan den ikasturteak izandako arrakasta ikusita, aurten hiru talde osatuko dira: hasiberrien talde bat eta beste bi jarraipen talde

ANTXON ETXEBERRIAZARAUTZ.

Euskal dantzen inguruko giroa sortu eta gure tradizioa diren erromeriak sustatu eta mantentzeko helburuarekin Zarauzko Udaleko Kultura sailak dantza ikastaroak eta dantzaldiak antolatuko ditu datorren ikasturtean ere. Aurreko urteko arrakasta ikusita, aurten hiru talde osatuko direla jakinarazi du Nekane Iribar Kultura zinegotziak. «Joan den ikasturtean hasiberrien taldean 30 pertsona izan ziren eta jarraipen taldean 40 inguruk hartu genuen parte. Jendea kanpoan geratu zela ikusita, aurten hasiberrien talde bat eta jarraipeneko bi talde osatuko ditugu, ahalik eta aukera gehien zabaltzeko parte hartu nahi duten guztiei».

Ikastaroak 2017ko urrian hasiko dira eta 2018ko maiatza arte luzatuko dira. Aurreko urtean bezala, ikastaroa Aritzbatalde kiroldegian izango da eta ALAKEN taldeko Goizane Arregik emango ditu eskolak. Guztira, 42 ordu izango dira aurtengo ikasturtean: 28 egunetan, 1,5 ordu egunean. Matrikula 85 eurokoa izango da eta izen ematea zabaldik dago Kultura saileko telefonoan (943005120) edota posta elektronikoan (kultura@zarautz.eus)

Dantzaldiak hilean behin

Dantza eskoletan ikasitakoa erakusteko asmoz, ALAKEN taldeak hilean behin dantzaldia eskainiko du. Aurreko urtean bezala, Musika plazan izango dira emanaldiak, eguerdiko 12:00etan, hileko lehen igandean.

«Jarraipeneko taldean ginenok lehen egunetik hartu genuen parte dantzaldietan baina hasiberriak segituan animatu ziren eta hilero Musika plaza betetzen genuen euskal dantzekin herria girotuz», nabarmendu du zinegotziak. Iribarrek herritar guztiak parte hartzera eta izena ematera animatzen ditu: «Dantza eskoletan oso gustura ibili ginen guztiok eta jendeak, orokorrean, ez zuen kale egiten. Giro aparta zegoen eta taldetxoak sortu genituen elkarrekin erromerietara joateko eta bertan ikasitako dantzak praktikan jartzeko. Oso ondo pasatzen genuen eta aurten ere berdin izango da, seguru».

Fotos

Vídeos