Euskal Jai egunerako karro lehiaketa antolatu du Udalak

Joan den urtean egin zen lehenengoz lehiaketa. Karro irabazlea, baserriko produktuekin sortutako orga.
Joan den urtean egin zen lehenengoz lehiaketa. Karro irabazlea, baserriko produktuekin sortutako orga.

Irailaren 9an ospatuko da, 13:30ean Lege Zaharren enparantzan, eta irailaren 8a bitartean eman daiteke izena Turismo Bulegoan

ANTXON ETXEBERRIAZARAUTZ.

Zarauzko Udalak, irailaren 9an ospatuko den Euskal Jai egunerako karro lehiaketa antolatu du. Aurreko urtean antolatu zen estreinakoz eta izan zuen arrakasta ikusita, sariketarekin jarraitzeko erabakia hartu du Udalak. Izan ere, lehen aldiz antolatutako orga lehiaketan 12 taldek hartu zuten parte.

Ixidor Larrañaga, Jai eta Ekitaldi zinegotziak sariketak izandako harrera «oso ona» izan zela azpimarratu du. «Ilusioz egindako orga originalak ikusteko aukera izan zen eta ziur nago aurten ere hala izango dela. Zarauztarren inplikazioa lehiaketan oso ona izan zen eta Iñigo Arrillagak eta bere taldeak aurkeztutako baserriko produktuez osatutako orga garaile izan zen. Benetan ikusgarria eta ederra egin zuten lana».

Zentzu honetan, karro lehiaketaren helburua festa girotzea, herritarrek sormena lantzea eta karrozen ohituraren oinordeko honekin jaia janztea dela azaldu du zinegotziak. «Deialdi honen bitartez, garai bateko karrozen lehiaketako tradizioari eutsiz, formatu txikiagoko orgen inguruan sortzen den giroa balioan jartzeko asmoa dugu».

Parte hartzeko baldintzei dagokionez, Zarautzen erroldatutako edonork izango du aurkezteko aukera eta izena Turismo bulegoan (Nafarroa kalea, 3) eman beharko da irailaren 8ko 14:00ak baino lehen. Izena emandakoan, zenbaki bat jasoko du parte hartzaile bakoitzak, eta zenbaki hori lehiaketa ospatzen den egunean, hau da, Euskal Jai egunean (irailak 9) bertan, aurkeztutako organ bistan jarri beharko du. Gaiari dagokionez, librea izango da baina euskal kulturaren edo Euskal Jaietako ohiturekin zerikusia izan beharko du. Udalak argi utzi nahi du ezingo direla supermerkatuetako karroak erabili lehiaketan parte hartzeko eta halaber, ezingo dela karroetan inolako publizitaterik egin. Aipatutako baldintzak betetzen ez dituzten karroak ez dira onartuko.

300 euro irabazleari

Guztira hamabi sari banatuko dira. Lehen saridunak 300 euroko saria jasoko du, eta gainontzekoek, 150 eurokoa. Orga guztiak Lege Zaharren enparantzan egon beharko dira irailaren 9an, 13:30ean, une horretan egingo baita sari banaketa. Epaimahaia ondoko kideek osatuko dute: Zarauzko alkate Xabier Txurrukak, Jai eta Ekitaldi zinegotziak, Ixidor Larrañagak, eta Artezaleakeko kide batek (edo beraiek izendatutako ordezkariek).

Temas

Jaiak

Fotos

Vídeos