Eskualdeko enpresa txikiei euskaraz egiten laguntzeko proiektu berria

Enpresa euskaraz. Proiektu honetan parte hartuko duten erakunde eta eragileak aurkezpenean.
/AMAXKAR
Enpresa euskaraz. Proiektu honetan parte hartuko duten erakunde eta eragileak aurkezpenean. / AMAXKAR

Enpresa Euskaraz Handitzen izenburua jarri diote eta laguntza zehatza eta praktikoa emango zaie 10 langiletik beherako enpresei

JUAN MARI ZUBIAURRE ZARAUTA.

Urola Kostako Udal Elkarteak Enpresa Euskaraz Handitzen proiektua aurkeztu berri du, Aia, Getaria, Orio, Zarautz eta Zumaiako enpresa txikiei euskaraz lan egiteko laguntza emateko helburuarekin. Programak bi urteko iraupena izango du, 2017ko azaroan hasita eta, guztira, 70.541,79 euroko aurrekontua erabiliko du Udal Elkarteak programa garatzeko.

Aurkezpenean izan ziren Udal Elkarteko eta udaletako ordezkariak (Oier Korta Zumaiako alkatea, Jose Angel Zaldua Orioko alkatea, Nekane Iribar Zarauzko Euskara zinegotzia, Igor Iturain Udal Elkarteko lehendakaria), Zarautz eta Zumaiako udaletako eta Udal Elkarteko euskara teknikariak eta programa garatzen parte hartuko duten aholkularitza eta komunikazio enpresa, Ahize-Aek eta Eregi, hurrenez hurren.

Imanol Urbieta zenak ondo ida-tzi zuen bezala, euskara txikia izanik ere asko maite eta egin dezakegu gure hizkuntzaren alde. Abesti ezagun hau oinarri hartuta, gure eskualdeko enpresa txikiak euskaraz handitu nahi dituzte UKUEtik. Honela, Aia, Getaria, Orio, Zarautz eta Zumaiako enpresa txikietan euskararen erabilera sustatu nahi da, euskararen erabilera handituz, enpresa bera ere handituko baita.

Izan ere, euskararen normalizazioa bizitzaren esparru guztietara zabaltzea guztion zeregina eta ardura da, eta Urola Kostako Udal Elkarteak baditu baliabideak herritarren esku. Aurkezpen bideoan agertu nahi izan zuten eran, keinu txikiak izanagatik ere, aldaketa handia daiteke.

Modu honetan, 10 langiletik behera dituzten enpresak hartu dituzte oinarri eta zerbitzua eta lana euskaraz eskaintzeko beharrezkoak dituzten tresna eta erremintak eskainiko zaizkie; bezeroekiko harremanetarako oinarrizko euskarri eta dokumentuak euskaraz jartzeko laguntza, oinarrizko zerbitzuak euskaraz egoki eskaintzeko edota lana euskaraz egiteko urratsak emateko laguntza eta aholkularitza...

Horretarako, lehenbizi bi saio praktikotan hartu beharko dute parte. Ahize-Aek aholkularitza-etxeak eskainiko ditu saioak eta ondoren laguntza eta aholkularitza indibiduala eskainiko zaie enpresei, erabaki dituzten urratsak ematen laguntzeko.

Programa honetan parte har dezakete Aia, Getaria, Orio, Zarautz eta Zumaiako enpresa txikiek (10 langile artekoek), sektorea eta jarduera edozein izanik ere. Kontutan izan behar da eskualdeko enpresen %90 hamar langile baino gutxiagokoak direla, gehiengoa beraz.

Lehen deialdi honetan, hala ere, deialdi berezia egiten zaie hiru arlo hauetako enpresei: estetika zentroak eta ile-apaindegiak; osasun arloko zerbitzu enpresak; eta ostatu zerbitzuak eskaintzen dituzten enpresak. Honek ez du esan nahi bestelakoak aukerarik izango ez dutenik, hauekin hastea erabaki da baina beste edozeinek ere izena eman eta bere interesa azaltzen badu partaide izango da proiektu honetan.

Hasiera batean hauekin hasiko dira, dagoeneko beraiekin harremanetan jarri dira eta orain beraiek izango dira interesa azaldu behar dutenak.

Saio hauetan euskara eta hizkun-tzak nola kudeatu, euskarak duen balio erantsia herritar eta bezeroen aurrean azaldu eta enpresetan zer egin dezaketen aztertuko dute, zehatz-mehatz. Saio horiek azaroaren 28 eta 29an eta abenduaren 12 eta 13an izango dira.

Bi saio hauen ondoren, aholkularitza eta laguntza indibidualaren txanda etorriko da. Proiektuaren zati honetan, enpresa bakoitzean zein neurri hartu eta landu zehaztu eta adostuko dute eta erabakitako lanak egingo dituzte, adibidez: itzulpenak, testu-ereduak egokitu, errotulazioa euskaratu edota softwarea euskaraz jarri.

Enpresa bakoitzak, bataz beste, 9 orduri dagozkion aholkularitza edo zerbitzuak jasoko ditu. Enpresarekin bertatik bertara egingo da lan, enpresa bertara joan, emailez eta telefonoz lan egin, eta abar.

Eskainiko diren zerbitzuen artean aholkularitza, zalantzak argitzea, itzulpenak, zuzenketak, hizkuntza teknikoa finkatzeko laguntza, ahozkoari eta idatzizkoari beldurra galtzeko eta hobetzeko ikastaroak eta trebakuntza, hizkuntza ohiturak aldatu eta erabilera sustatzeko gomendioak eta dinamikak besteen artean aurkituko dituzte enpresa txiki hauek.

Enpresa bakoitzean egingo den lanketak hiru edo lau hilabeteko iraupena izango du eta eskatzen den gauza bakarra adostutako neurri, epe eta lanak egitea izango da eta honetaz gain, enpresetan euskara susta-tzeko ekimenetan parte hartzea (jardunaldiak, ikastaroak...).

Parte hartu nahi duten enpresek izena eman behar dute, Udal Elkartearen webgunean dagoen formulario erraz bat betez edota honako helbide honetara mezu elektroniko bat bidaliz: handitzen@urolakosta.eus.

Contenido Patrocinado

Fotos

Vídeos