Diario Vasco

Zarauzko Gazteria Zerbitzu berria diseinatzeko parte-hartze proiektua martxan

  • Lehen bilera bihar izango da, 18:00etan Arizbatalde kiroldegian

Gaztematikak (Gipuzkoako Haur eta Gazteen Sustapenerako Sareak) eta Gipuzkoako Foru Aldundiko partaidetza sailak sustatuta, Zarauzko Udalarekin elkarlanean, gauzatuko da Zarauzko Gazteria Zerbitzu berria sortzeko proiektua. Proiektu pilotu honen bitartez gazteekin batera diseinatuko da zerbitzua eta 18 eta 30 urte arteko gazteei begira egingo du lan. Gazteentzat denez gero, gazteekin ari dira egiten lanketa eta Emuneko parte hartze zerbitzutik bideratuko da proiektuaren alde teknikoa.

Proiektuak bost fase ditu orotara: prestaketa, diagnostikoa, proposamena, ebaluazioa eta sistematizazioa. Orain Zarauzko gazteriaren diagnostikoa osatzea izango da lehen pausua eta dagoeneko hainbat gazte elkarrizketatu dira euren esperientzia eta ikuspuntua ezagutzeko; gazte horietako batzuk elkarrizketatzaile bezala ere aritu dira, gainera. Zentzu honetan, bihar 18:00etatik aurrera Aritzbatalde kiroldegiko hitzaldi aretoan egingo den bilera ireki batean aurkeztuko dira elkarrizketa horietan jasotako edukiak eta bertaratzen diren gazteen iritzi eta ekarpenekin osatuko da diagnostikoaren lehen atala. Gazteak dira herri honen etorkizuna eta eurek izan behar dute euren etorkizunaren jabe, horregatik, ezinbestekoa izango da prozesuan parte-hartzea. Lehenengo tailer honetara gonbidapena luzatuz bideo bat zabaldu dute sare sozialen bitartez eta Zarauzko hainbat gazte euren iritzia partekatuz eta prozesuan parte hartzera animatuz agertzen dira bertan.

Zerbitzu berria osatzeko prozesuarekin jarraituz, diagnostikoa osatzeko, azaroaren 25ean mapeo ariketa bat egingo da gazteek Zarauzko guneak sailkatu ditzaten eta espazioen erabilera ezagutzeko; eta azkenik, abenduaren 1ean gaika landuko dira gazteen ekarpenak diagnostikoa ixteko. Udalak konpromisoa hartu du prozesu honetatik aterako dena aztertu eta gauzatzen laguntzeko.

Recibe nuestras newsletters en tu email

Apúntate