Diario Vasco

Hasiera bikaina Ulacia Gruporentzat

  • EBA Ligako lehen bi partiduetan bi garaipen eskuratu ditu; bigarrenean 83-62 mendean hartu zuen Venta de Baños

Denboraldiko etxeko lehen partida jokatu zuen igandean Ulacia Grupok eta garaipen bikaina lortu Venta de Baños talde palen-tziarraren aurka, 83-62. Horrekin EBA Ligako lehen bi partiduetan bi garaipen eskuratu dituzte Goar Artetxek zuzentzen dituen mutilek.

Itxura polita zuen igande arratsaldean Aritzbatalde Kiroldegiak. Horretan ere lagundu zuen urtetako ametsa errealitate bihurtzea lortu zutela ZASTeko arduradunek. Klubeko jokalari guztiak bildu eta familia argazki ederra eta ahaztezina atera zuten, taldeko argazki bana atera ostean. Argazkian parte hartu zuten jokalarietako asko Ulacia Gruporen partida ikustera eta horiei iazkoan ohikoak ziren zaletuak eta jende berria ere gehitu zitzaien, denak saskibaloiaren ikuskizunaren hasierarekin gozatzeko asmoa eta taldearen bigarren garaipena zuzenean bizitzeko gogoarekin.

Giroa lagun, zaletuak laguntzeko prest, baina jokalariek ez zioten oso fin ekin partiduari. Lehen partziala 21-24 amaitu ostean, bigarren laurdena aldrebes hasi zen, bigarren minutuan Jon Perez epailea lesionatu eta Jorge Caamaño geratu zen epaile bakar gisa. Ondo etorri zitzaion lesioaren momentua Ulacia Grupori Xabier Osak lortutako 5-0ko parzialari esker partida 26-26 berdin-tzea lortu zuten zarauztarrek. Baina gutxi iraun zien pozak Goar Artetxeren mutilei, 1-9ko partziala lortu bait zuten palentziarrek. Hortik aurrera partida pixkanaka hausten hasi ziren Ulacia Grupoko jokalariak, azken 8 minutuetan 21-12ko partziala eskuratu eta aurretik iritsi ziren atsedenaldira 42-38.

Aldagelatik pilak ondo kargatuta atera ziren zarauztarrak, ondo ikasia zuten zonaren aurka nola jokatu behar zuten eta barruko jokoan zein hiruko marratik min eginez markagailuko aldea zabaltzen joan ziren, batez ere hirugarren laurdeneko 5. minututik aurrera, 12-2ko partziala eskuratuta. Laugarren laurdenekoak jokalarien eta zaletuen gozamenerako minutuak izan ziren, tentsioa eta presioa gainetik kendu eta garaipenarekin minutu luzez gozatzekoa. Azkenean tarte zabala erakusten zuen markagailuak, 21 puntu, 83-62, averagerako garrantzitsua izan litekeena.

Partiduko zenbakiei begiratuta Aitzol Eguskiza izan zen partiduko saskiratzaile nagusia, 18 punturekin, eta pibot zarauztarra ere izan zen Ulacia Grupoko jokalari baloratuena 21 punturekin. Aipagarria lau jokalarik gainditu zutela 10 puntuko langa, Aitzolez gain, Xabier Osa, Jon Saez de Ocariz eta Jon Sanzek. Horrekin batera, talde joko bikaina erakusten duen beste datua dugu tadeak eman zituen 29 asistentziak.

Datorren igandean 3. garaipenaren bila joango dira Nafarroara. Valle de Egües talde igo berria izango dute aurkari. Aukera polita garaipenen poltsa betetzen jarri eta maila mantentzeko bidea aurrera pauso garrantzitsu bat emateko.

Recibe nuestras newsletters en tu email

Apúntate