Diario Vasco

Adin guztiei zuzendutako kuadrila eguna ospatuko da bihar Zarautzen

Eguerdi partean herri bazkaria izango da Musika Plazan.
Eguerdi partean herri bazkaria izango da Musika Plazan. / AMAXKAR
  • Egitarau zabala prestatu da; herri kirolak bi adin tartean banatuko dira, parte hartzea handitzeko

Ohiturari jarraituz, urriko hirugarren larunbatean, bihar, Kuadrila Eguna ospatuko da Zarautzen. Egun arrakastatsu bat ospatzeko, Zarauzko Udaleko Gaztedia saialaren babesarekin kuadrila eguna antolatzen aritu den taldeak argi izan du hasieratik adin guztiei zuzendutako eguna antolatu behar zela. Zentzu honetan, gaztetxoei, nerabeei eta gazteei zuzendutako egitarau zabal eta anitz bat antolatu da. Izan ere, Kuadrila Eguna guztiona da; beraz, bai goizean, bai arratsaldean, ekintza ugari antolatu dira zarauztar guztientzat. HALA, gaztetxoenen eremuak Salbide eta Frontoi Txikia izango dira; nerabeen gunea, Lege Zaharren enparantza eta gazteen erdigunea, berriz, Musika plaza izango da.

Herri kirolak

Goizean, azken urteetan bezala, herri kirolak antolatu dira Lege Zaharren enparantzan. Azken urteotako gazteen parte-hartze urriari buelta eman nahian, aurtengoan, bi adin tarte banatuko dira: 18 urtetik gorakoak eta beherakoak. Lehenengoek 10 kilo txuleta eta gazta zatia izango dute jokoan; bigarrenek, aldiz, afari eder bat. Honela, aurten herri kirolak suspertzeari eman diote garrantzia eta antolatzaileek gainontzeko gazteak gonbidatu nahi dituzte goizeko ekintza eder horretan parte hartzera. Pasa den urtean, egunaren sorrera lekura (Musika plazara) itzuli zen gazteen jai gunea; eta aurten ere, aurreko urteko arrakasta ikusi ostean, bertan egingo dira gazteen ekintza nagusiak, hala nola, herri bazkaria eta gaueko erromeria.

Pasta eta patata tortilla

Eguerdian, kuadrilen arteko pasta eta patata tortilla lehiaketa egingo da. Aurreko urteko galtzaileak epaimahaikide izango dira. Antolatzaileek gogoratu dute herri bazkarirako plater birziklagarriak egongo diren arren, jan tresnak norberak ekarri beharko dituela etxetik. Urtean zehar egiten dituzten ekintzetarako dirua batu nahian, Txipristin aisialdi taldeak txosna jarriko du bertan. Arratsaldeko ekintzak ere hiru gunetan banatuko dira. Batetik, Frontoi Txikian, 16.30etik aurrera, arku tiroa, ginkana... antolatu dira; 19.00etan Mimoaren erakustaldia dago aurreikusia. Bestetik, Lege Zaharren enparantzan, nerabeentzako gunea egongo da 16.00etatik aurrera, eta 19.00etan hasiko da diskofesta, lehenik DJ Javiren eskutik, eta, ondoren, DJ Davilarenetik. Azkenik, gazteek bigantxekin dute hitzordua Munoan 18.00etatik aurrera eta kuadrilen arteko jokoak ere egongo dira bertan. Jarraian, Eibarko Ustekabe fanfarrearen musikarekin dantzatu ahal izango dute, kalejira eta jolasak izango baitira kaleetan zehar.

Gauean, berriz, zarauztar guztiak gune batean batu nahian, kaleko festak hauspotu nahian, eta ohitura zaharrak berreskuratu nahian, Luhartz taldearen eskutik erromeria egongo da 22.30etik 3.00etara. Ondoren, musikak alaituko du gaua, 4.30ak arte.

Jonan Urdangarin Urrutia Gaztedi zinegotziak herritar eta batez ere, gazte guztiak animatu nahi ditu Kuadrila Egunean parte hartzera eta iazko giro apartaz gozatzera: «Jaiarekin gozatzeko eskatu nahi diet herritarrei eta arduraz eta errespetuz jokatzeko».

Recibe nuestras newsletters en tu email

Apúntate