Diario Vasco
Jabetze Eskolako egitaraua.
Jabetze Eskolako egitaraua.

Jabetza Eskolako egitarau zabala du Parekidetasun departamenduak

  • Guztira, 12 ikastaro desberdin antolatu dira aurtengorako, iazkoarekin alderatuz, ikastaro guztiak berriak. Izena emateko epea bihar zabaltzen da, urriaren 10a bitartean

Zarauzko Udaleko Parekidetasun departamentuak Emakumeentzako Jabetze Eskolako egitarau berria prestatu du. Emakumeentzako Jabetze eskolak emakumeok ahalduntzea du helburu nagusiena. Eskola formazioa jasotzeko, hausnartzeko eta esperientziak elkar trukatzeko gune bat da, eta ahalduntze pertsonala eta kolektiboa eskuratzeko lagunduko diete. Bizitza modu autonomoan, indartsu eta konfiantzaz bizi izatea da ahalduntzea, aukeratzeko eta aldaketa sozialean parte hartzeko eskubidea.

Aldaketa pertsonal eta kolektiboa bultzatzea da emakumeak ahalduntzeko eskolaren erronka, zergatik eta, gizonen eta emakumeen arteko botere-harremanak aldatzea eta emakumeek gizartean eta politikan parte-hartze handiagoa izatea delako aldaketa-prozesu horren helburua, eta ondorio zuzena ere bai.

Aurten ikasturte osorako egitarau bateratua prestatu da, eta ikastaroak 2016ko urritik 2017ko maiatzera izango dira; 12 ikastaro berri prestatu dira, ikastaro guztiak berriak. Landuko diren gaiak aukeratzeko, aurreko urteetan Jabetze Eskolan parte hartu duten emakumeei kontsulta egin zaie, eta euren eskaerei erantzuten saiakera egin da ikastaroak aukeratzean. Aukera oso zabala eta erakargarria dela nabarmen da. Ikastaroak goizez eta arratsaldez izango dira eta adin guztietako emakumeei bideratuta daude.

Ikastaro aukera

Ikastaroak, ondorengoak dira: 'Sentir mis límites'; 'Autodefensa feminista'; 'Urbanismo y empoderamiento'; 'Komunikazioa sexista al da hedabideetan'; 'Autoestimua'; 'Jendaurrean hitz egiteko teknikak'; 'Klown-a eta ahalduntzea'; 'Mujeres cuidadoras. Y a tí ¿quién te cuida?'; 'Autoezagutza eta norberaren ahalmena'; '¿Qué sabe tu cuerpo que tú no sabes aún?'; 'Gure sentimenduak landuz, gu geu onartu'; eta, azkenik, 'Antzerkia eta ahalduntzea'.

Udaletxe berrian

Ikastaro guztiak udaletxe berrian, Etxezabalan (Kale Nagusia 29) egingo dira, beheko solairuan dagoen aretoan, eta izen-emate epea hilaren 26tik, hau da, bihartik, urriaren 10era izango da.

Ikastaroetan izena emateko emakumeak Herritarren Arreta Zerbitzura (HAZ) joan beharko dute. Bertan izen-emate orria bete beharko dute, edo nahi izanez gero, emailez bidali dezakete. Izen-emate orria eta ikastaro guztiei buruzko informazio zehatza Parekidetasun departamentuko blogean aurki dezakete:www.berdintasunazarautz.wordpress.com (Emakumeen-tzako Jabetze Eskola).