Diario Vasco
Iñurritzan. Gaztetxo zein heldu arratsalde dotorea pasatzeko aukera izan zuten igandean.
Iñurritzan. Gaztetxo zein heldu arratsalde dotorea pasatzeko aukera izan zuten igandean. / AMAXKAR

Euskal Asteak asteburu ederra igaro du, ostirala heldu bitartean

  • Larunbat eta igandean giro oso ona izan da herrian eta dena prest dago ostiraleko egun handia heldu bitartean

Euskal Astea pil-pilean egon da asteburuan gurean. Larunbat eta igandean herriko kaleetan nabaria izan da urte garai honetan Zarauzko herriak ospatzen duen jai giro berezia. Eta hau guztia datorren ostiraleko Euskal Jai egunaren aurrerapena besterik ez da izan.

Egitarauaren barne, ohikoa denez, hainbat txapelketa antolatu dira eta ikusmin handia sortu dute gainera. Bikote Gazteen Dantza Txapelketak zabaldu zuen Lege Zaharren Enparantzan antolatu diren lehiaketa zerrenda. Hamaika bikote eta maila oso ona. Epaileen esanetan, Lezotik etorritako Iker Belintxon eta Maider Aginaga (72,25) izan ziren onenak baina bigarren tokian sailkatu ziren Julen Berrondo eta Nagore Berrondo (72,00) errezildarrak ere hurbil geratu ziren puntuaketari dagokionez. Irabazleak jantzi egokienaren saria ere eskuratu zuten.

Aurresku txapelketan, garaile izan zen Beñat Asensio (Lezo) Asier Rios errenteriarraren aurretik. Soinu Zahar Txapelketan berriz, Oiar-tzundik etorritako Izar Etxeberria izendatu zuten irabazle Udane Eskuderoren aurretik. Binakako Txapelketan Azpeititik etorri zen bikote garailea, Amets Amubieta eta Larraitz Larrañagak osatutakoa. Jan-tzi egokienaren saria Xabier Artola eta Idoia Besadarentzat izan zen.

Igandean Haurrak izan ziren protagonistak eta goizetik gauera herriko kaleetan ikusi genituen baserritar jantziak soinean zituztela. Mutriku, Gabiri, Forua, Oñati eta Zumarragako dantzariak herriko Jalgi taldearekin batera aritu ziren kalez kale emanaldiak egiten. Iñurritzako zelaian ere giro oso ona izan zen arratsalde osoan eta erakutsi ziguten helduoi festak nola bizi.