20 urte baino gehiago Gureakekin elkarlanean

Lanean. Indauxeko kaxoi metalikoen sailean umore onarekin egiten dute lan egunero. / ARGAZKIAK AMAXKAR
Lanean. Indauxeko kaxoi metalikoen sailean umore onarekin egiten dute lan egunero. / ARGAZKIAK AMAXKAR

90eko hamarkadaz geroztik elkarrekin, iaz zabaldu egin zen bien arteko akordioa Gureaki aukera berriak eskainiz

JUAN MARI ZUBIAURRE GETARIA.

Indauxen 55 urteko historian, euren bazkideekin harreman iraunkorrak eratzeko ahalegina izan da euren izaeraren ezaugarrietako bat. Beste bat, garapen iraunkorrarekiko eta gure inguruneko gizarte-onurarekiko konpromisoa.

Indauxen akziodunen gizarte-sentikortasun handia dela eta, enpresak lan-inklusioaren aldeko joera nabarmena izan du hasiera-hasieratik, eta, ildo horretan, aldaketak egin ditu zenbait lanpostutan, desgaitasunen bat duten pertsonek haietan jardun dezaten.

Testuinguru horretan, duela 20 urte baino gehiago, Indauxen eta Gureaken arteko lankidetza hasi zen. Gipuzkoako enpresa bat da Gureak, gizarte eta lan inklusioaren euskal ereduaren erreferentzia, eta, eredu horri esker, desgaitasuna duten pertsonen langabezia tasa Estatukoaren erdia da Euskadin (% 31 eta % 15,9).

Hasiera-hasieratik, Indauxek lan-inklusioaren aldeko sentikortasun handia erakutsi du, eta, gaur egun, enpresako lanpostuen % 2,5 egokituta dago.

1990eko hamarkadan, Indaux Gureaken tailerrera (lehen Orion zeukan, eta orain Zarautzen) muntaketa- anak bidaltzen hasi zen. Horren ondorioz, Gureaken Urola Kostako enpresa eragileetako bat da. Garai hartan, Gureak Marketingekin ere hasi ziren elkarlanean; haren esku uzten dituzte mezularitza-zerbitzua, fakturak eta merchandisinga. Elkarrekin ondo moldatzen direnez, ematen dizkieten zerbitzuak zabaldu dituzte, eta dokumentazio ziurtatua eta isilpeko dokumentuak suntsitzen hasi dira.

Implant Getarian

Azken urteetan, Gureakek lankidetza handitu du bere bezero nagusiekin, laguntza-beharrik handienak dituzten pertsonentzat lanpostu berriak sortze aldera. 2016ko ekainean, Gureakekin duten harremana estutu zuten eta beste aurrerapauso bat eman zuten Gipuzkoa zuzen eta orekatuago bat lortzeko euren konpromisoan.

Horrenbestez, beste bi proiektu lagungarriren ardura eman diote Gureaki: erretraktilaketa eta zintilikatzea eta jaistea pintura-katean. Oraingoan, logistikarekin lotutako kontuak direla eta, Gureaken Abendañoko instalazioetan egin beharrean, proiektuak Indauxen Getariako kaxoi metalikoen instalazioan egiten dira. Horren ondorioz, instalazio horretako giza paisaia nabarmen aldatu da.

Hori dela eta, tailerretik etorri eta Indaux bezalako enpresa batean hasten diren pertsonentzat, oso harro sentitzeko moduko aurrerapausoa da. Gainera, haientzat, erronka bat da herritik ezagutzen duten pertsonekin lan egitea, gehienak Zarautz, Getaria edo Zumaiakoak baitira. Taldean, zenbait emakume daude, eta Indauxen lan egiten duten pertsonen senideak ere bai.

Langileen balio erantsia

Lan osagarriak enpresatik kanpo ateratzea oso lagungarria da, Indauxeko langileek funtsezko eta balio erantsi handiagoko lanetan jar baitezakete arreta, enpresako etengabeko hobekuntza-programetara egokitzeko.

Testuinguru horretan, honako hauek jarri dira martxan: TPM etengabeko mantentze-programa, mantentze-lan prediktiboari buruzko prestakuntza, eta erakundearen eraginkortasuna eta kalitatea hobetzeko beste ekintza batzuk.

Horri guztiari esker, Indauxek bere produkzio-eredua egokitu ahal izango du burdineriaren sektoreko eskakizunetara. Indauxek eta Gureakek lortutako akordioari esker, desgaitasuna duten Urola Kostako 25 pertsona inguruk gizarte eta lan inklusioa lortzeko aukera dute. Eta, aukera horrekin, Gureakeko pertsona bakoitzak, Indauxeko langile guztiak eta, oro har, Gipuzkoako gizarteak irabazten du.

Más

Contenido Patrocinado

Fotos

Vídeos