Udalak gastroentirisaren prebentzio neurriei eusten die, behin betiko emaitzak izan arte

Osasun Zentroan mugimendu handia izan da azken egunetan. /
Osasun Zentroan mugimendu handia izan da azken egunetan.

Astelehenerako espero dituzte egin dituzten analisi epidemiologiko eta kultiboen emaitzak

JOSU ARANBERRI USURBIL.

Gastroenteritisa zerk eragin duen aztertzen ari den lan taldeak atzo goizean bilera egin zuen, eta, behin betiko emaitzak astelehenerako espero dituzte. Gaixo kopuruak behera egin du nabarmen azken orduetan, eta badirudi okerrena pasatu dela. Edozein kasu, brotea zerk eragin duen argitu bitartean, Udalak eutsi egin die prebentzio neurriei, eta badaezpada ere, iturriko ura ez edateko aholkatzen die herritarrei.

Gastroenteritis brotearen jarraipena egiten ari den lan taldeak atzo goizean bilera egin zuen. Lan talde horretako kideak honako hauek dira: Xabier Arregi Usurbilgo alkatea eta Jone Urdanpilleta zinegotzia, Marije Imaz Ikastolako zuzendaria, Juncal Artieda Gipuzkoako Osasun Publikorako Zuzendariordetzako Epidemiologia Unitateko ordezkaria, Tomas Plazaola Tolasa-Goierriko Osasun Publikoko eskualdeko koordinatzailea eta Mikel Aierdi uraren kalitatea neurtzeko Eusko Jaurlaritzak duen erakundeko ordezkaria.

Gastroenteritisa zerk eragin duen aztertzen dabiltza, eta horretarako hainbat analisi epidemiologiko egin dituzte, baita kultiboak hartu ere. Azterketa horren emaitzak astelehenerako espero dituzte, eta eskuratu bezain pronto, agerraldi publikoa egingo du lan taldeak, horren berri emateko. Egoera hobera egiten ari da pixkanaka-pixkana, izan ere, kasuak gutxitzen ari dira nabarmen azken orduetan. Okerrena pasatu dela dirudi. Ikastolan, esaterako, atzo 60 haur ziren ondoezik etxean geratu zirenak, asteartean, ordea, 180 izan ziren.

Edozein kasu, lan taldeak beharrezko ikusi du prebentzio neurriei eustea, eta osteguneko Osasun bandoan aditzera eman bezala, Udalak herritarrei aholkatzen die iturriko ura ez edatea. Oraindik ez dago garbi zerk eragin duen brotea, baina badaezpada ere, urik ez edatea aholkatzen da.

Contenido Patrocinado

Fotos

Vídeos