Nafartarrak taldeak hainbat ekimen antolatu ditu hilabete honetarako Usurbilen

Eñaut Etxamendi.

Bi dokumental, hitzaldi bat eta mendi irteera bat izango dira

JOSU ARANBERRI USURBIL.

Nafartarrak taldeak antolatuta bi dokumental, hitzaldi bat eta mendi irteera bat izango dira datorren astean.

Asteartean, urriaren 10ean, izango da lehenengo emanaldia. Izan ere, Sutegi eraikineko auditorioan 'Atxorrotxeko gaztelua. Denboraren talaia' dokumentala ikusteko aukera izango da arratsaldeko 19:00etan hasita. Bere garaian Nafarroako tenentzia bat izan zen Aizorrotz, gune garrantzitsua erresumaren lurraldetasunaren sisteman. Bertan eraiki zen Erdi Aroko gaztelu nafarra, inguruko jendearentzat Atxorrotx izenekoa, tenentziaren egoitza zena, 1.200 urtean Gaztelak Nafarroako kostaldeko lurraldeak konkistatu aurretik. Gaur, Deba bailarako hondakin hauek memoria gune bat dira guretzat, gure historiaren oroigarria, gertaera askoren lekuko.

Hurrengo egunean, urriaren 11n, beste emanaldi bat izango da Sutegin 'The Basques of Santazi' hain zuzen ere. 19:00etan hasita, 80ko hamarkadaren amaiera aldera filmatu zen dokumentala eskainiko dute. Bi urtez, Zuberoako Saint Engrance herrixkan bi artzain familiaren eguneroko bizimodua jasotzen ibili ziren kamerak, Pirinioetan bertan, Belagua haranaren beste aldean.

Urriaren 14an, larunbatean, Eñaut Etxamendiren hitzaldia izango da Sutegin goizeko 11:00etan hasita. Eñaut Etxamendi, nafarra, gizon handia Usurbilen izango da. Kantaria (Etxamendi eta Larralde), hizkuntzalaria (euskararen jatorriari buruzko tesia egina du), artzaina... ekintzailea. Hamaika eskarmentu jasotako pertsona, eta abertzalea. Zeresan handia duen gizon honekin solasaldia izango da. Gai hauek guztiak jorratuko dituzte eta beste hainbat ere bai. Hau guztia borobiltzeko, berarekin Ainhoa Larrañaga (Mondragon Unibersidadeko irakaslea) izango da.

Azkenik, urriaren 15ean, igandean, mendi irteera izango da. Eskoriatzako Atxorrotxeo gaztelura joateko asmoa dute. Atxorrotz mendi tontorrak gaztelu baten aztarnak gordetzen ditu, arrano kabi bat balitz bezala. Lekuaren garaierak irudi ikaragarriak eskaintzen dizkigu. Gaztelu nafarrak bertatik zaintzen du Gipuzkoara sartzeko bidea. Handik sartu ziren gaztelarrak.

Goizeko 9:00etan izango da irteera ordua udaletxeko autobus geltokian eta behar adina jende izanez gero autobusa antolatuko litzateke. Bazkaria norberak eraman beharko du. Izena emateko 650195941 (Jexux) telefono zenbakira deitu daiteke.

Fotos

Vídeos