Lapurreta egin dute Eskualtxeta kulturgunean

Lapurreta. Artzapeko bulegoaren egoera honelakoa zen bertatik lapurrak pasa ondoren. / ARTZAPE

Kaltetuen artean Artzape aldizkaria aurkitzen da eta lanabes ugari ostu dizkiete lapurrek

JUAN MARI ZUBIAURRE GETARIA.

Ostegun goizaldean lapurrak sartu ziren Eskualtxeta kulturgunean eta hainbat kalte eragin dituzte bertako lokaletan. Jakina bertan elkarte askoren egoitzak daude eta denetara sartzerik izan ez badute ere, batzuetan kalte nabarmenak eragin dituzte.

Hauen artean Artzape aldizkaria aurkitzen da, bertan duten bulegora sartu eta lanabes ugari ostu dizkiete. Benetan tamalgarria da jakinik beraiek dioten bezala, «gurea bezalako hedabide herrikoi batentzat egundoko kalte materialak suposa-tzen ditu lapurretak. Horregatik, Udala eta Ertzaintzarekin elkarlanean aritu gara goizetik, nondik norakoak xehatu asmoz. Lanerako beharrezkoa dugun materiala falta zaigu, ordenagailuak, argazki kamerak, editazioko programak eta gainontzeko materiala. Lapurretak etorkizunerako dugun proiektu berritzailea kolokan jarri du, aurre egin beharreko diru kantitateak medio».

Normaltasuna ahalik azkarren berreskuratzea dute orain xede, eta «lanean ari gara dagoeneko. Hala ere, baliteke material faltagatik paperezko edizioaren argitaratzea atzeratzea. Jakinaren gainean izango zaituztegu. Edonork argibiderik nahi badu, 943000548 telefono zenbakian aurkituko gaituzue goizeko 9etatik iluntzeko 20etara» adierazi dute euren facebook-eko orrian.

Azkenik, «gure elkartasuna adierazi nahi diegu gurekin batera kaltetuak suertatu diren kultur eragileei, eta eskerrak eman Getariako Udalari eta Ertzaintzari».

Atzo kultur eragileak bertaratu eta euren gauzen egoera aztertzeko eguna izan zen.

Fotos

Vídeos