Jokin Aranburu garaile San Roman sarian

Jokin Aranburu zarauztarraren lehen garaipena 23 urte azpikoetan./
Jokin Aranburu zarauztarraren lehen garaipena 23 urte azpikoetan.

JUAN MARI ZUBIAURRE ZARAUTZ.

Asteazken honetan, 41. San Roman Saria lehiatu zen Muxikan (Bizkaia), Lehendakari Txapelketaren barne (23 urte azpikoak). Irteeran 150 txirrindulariek 128,6 km zituen ibilbideari ekiteko.

25km inguru zituen zirkuitu bati bost itzuli eman behar izan zizkioten, eta amaieran, San Romango ermitako 600 metroko aldapean helmuga. Mendatako gaina gainditu behar zuten itzuli guztietan.

Lehenengo itzulian egin zen eguneko ihesaldia. Hamar bat txirrindulariz osatua eta horietatik bost Lizarte taldekoak. Itzuliz itzuli ahalegindu ziren, gehienbat Euskadi taldekoak eta tarteka Ampo taldekoak, ihesaldia deuseztatzen.

Azken itzulian denak bat egin, eta azken 600 metroak, aldapa gorakoak, erabakigarriak izango ziren. Omer Goldsteinek (Israel), Jokin Aranbururen taldekideak, egin zuen kontrol lana azken 150 metro arte, eta zarauztarrak lortu zuen garaipena helmugan.

Bigarren, Mauricio Moreira (Caja Rural) eta hirugarren Mikel Alonso (Euskadi) izan ziren. Afizionatu mailako lehen garaipena izan da zarauztarrarentzat.

Contenido Patrocinado

Fotos

Vídeos