Herri galdeketaren alde sinadurak biltzen hasiko da 'Beizamak erabaki' taldea

'Beizamak erabaki' taldeko hainbat kide, aurkezpenean.
'Beizamak erabaki' taldeko hainbat kide, aurkezpenean.

Sinadura bilketan jarritako helburua betez gero, azaroaren 5ean egingo da galdeketa

E.A. BEIZAMA.

Erabakitzeko eskubidea «aldarrikatzetik gauzatzera» igarotzeko asmoz sortu berri da 'Beizamak erabaki' taldea, erabakitzeko eskubidea «guztion topalekua» dela sinetsita. «Gure iritziz, subiranotasun edo herri-antolaketa auziak bezalakoak modu baketsuan, demokraziaren arauak jarraituz eta herritarron parte-hartzean sakonduz bideratu beharko lirateke, aukera guztiak errespetatuz eta posible eginez, eta erabakiak herritarron borondatean eta nahietan oinarrituz», esan zuten igande arratsaldean egindako aurkezpen ekitaldian.

Honela, taldeak hiru maila dituen ibilbidea proposatu du. Lehenik, herri-galdeketaren alde sinadura bilketa abiatuko dute. Sinadura bilketaren helburua betez gero, herri galdeketaren data azaroaren 5a izango litzateke.

Erabakitzeko eskubidearen alde egonda, Beizaman independentziari buruzko herri-galdeketa egitearekin bat datozenen sinadura bilketa egingo da. Sinadura ematea izango da herritar bakoitzak proposamen hau babesteko ekintza.

Gipuzkoako bihotzean kokatutako herri txiki bat da Beizama, 160 biztanleduna, eta asmoa da herritar guztiengana mezua helaraztea. Sinadurei dagokienez, Beizamako biztanleengandik «ahalik eta babes handiena lortzea» da helburua.

Sinadura bilketarako jarritako helburua betez gero, herri-galdeketa antolatuko dute Beizaman. Honela, taldeak adostu du eguna ere, azaroaren 5a izango da eta ' Nahi al duzu Euskal Herri independente bateko herritarra izan?' izango da galdera.

Era askotako egitasmo eta ekitaldien bidez, herri galdeketaren aldeko kanpaina egin nahi dute, antolaketa lanean beizamatarren parte-hartzea sustatuz eta lan talde irekietan lan eginez.

Adostutako egunean, 16 urte edo gehiago dituen Beizaman erroldatutako pertsona orok bere iritzia emateko aukera izango du. Herri-galdeketa egingo den eguna erabakitzeko eskubidearen aldeko jaia izango da. Helburu nagusia galdeketa egitea eta ahalik eta parte-hartze handiena lortzea izango da, ez emaitza.

Duela urte batzuk sortu zen Gure Esku Dago herri-ekimena, «herri bat gara, erabakitzeko eskubidea dugu eta herritarron garaia da» mezuarekin. Modu askotako ekimenak antolatu eta egin ditu ordutik, tartean 2014ko ekaineko giza katea, 2015eko ekaineko bost hiriburuetako ekitaldiak, 2017ko Bilboko mosaikoa, Euskal Herriko herri ezberdinetan 2016 eta 2017an egindako herri kontsultak, e.a. Bide horretan aurrera eginez, 2018a bitartean eremuz eremu erabakiaren bidea jorratuko du Gure Esku Dagok.

Fotos

Vídeos