Gure Esku Dagok Getarian gizakatea egiteko aurkezpena egingo du

Datorren larunbatean egingo da Berdura Plazan eguerdian bertsolari eta musikariekin

JUAN MARI ZUBIAURRE GETARIA.

Datorren ekainaren 10ean Donostia, Bilbo eta Gasteizko Parlamentua lotuko dituen 201,9 kilometro luzeko gizakatea egingo da erabakitzeko eskubidearen alde. Kate hau Getariatik pasako da, eta Getariarrei erronka bota diete: kateko bi kilometro bete behar dira bertako herritarrak elkar esku emanda.

Horrela, datorren larunbatean, Getariako Gure Esku Dagok gizakate honen aurkezpena egingo du. Bertan, gizakateari buruzko informazioa emango da, eta parte hartzeko izena emateko aukera egongo da. Ekainaren 10eko ekitaldian parte hartzeko ezinbestekoa izango da aurrez izena ematea eta hau lehenbailehen egitea gomendatzen da. Izena emateko orduan 5 euro ordaindu behar dira eta bakoitzari Gure Esku Dagoko zapi bana emango zaio ekainaren 10ean erabiltzeko. Gainera, Gure Esku Dagoko kamiseta berriak ere salgai egongo dira 10 euroren truke. Biltzen den dirua antolaketa gastuetara bideratuko da.

Ekitaldi hau herriko musikari eta bertsolariek girotuko dute. Aurkezpena Berdura Plazan izango da 12:00etatik aurrera.

Contenido Patrocinado

Fotos

Vídeos