Getariako Udalak Kataluniako erreferendumaren aldeko mozioa aho batez onartu du plenoan

Udaletxean gaur banatuko dira esteladak eta balkoietan jartzea eskatzen dute. / AMAXKAR

Igandean esteladak balkoietan jartzeko deia luzatu du eta gaur udaletxeko bulegotan banatuko dira

JUAN MARI ZUBIAURRE GETARIA.

Getariako Udalak joan den asteazkenean egindako osoko bilkuran Kataluniako erreferendumaren aldeko mozioa aho batez (EH Bildu eta EAJko zinegotziak) onartu zuen.

Urriaren 1ean Katalunian iragarrita dagoen erreferendumaren aldeko mozioa bi udal taldeek adostuta aurkeztu zuten eta zortzi puntu zituen. Gure Esku Dago ekimenak ere bere atxikimendua eman zion.

Lehenengo puntuan zera adierazten zuten, «Udal honek zilegitasun osoa aitortzen dio Kataluniako Parlamentuak egingo duen autodeterminazio erreferendumari». Bigarrenean, gatazka politikoa konpon-tzeko «biderik eraginkorrena prozesu demokratikoen erabileran da-tzala» azaltzen zuten eta «elkarrizketa eta negoziazioaren eskutik akordioa lortzean eta hauek lortu ezean herritarren gehiengoaren asmoa eta erabakia errespetatzea».

Hurrengoetan igandean oztoporik ez jartzea, elkartasuna adierazi Kataluniako herriari edo hartutako erabaki judizialak salatzen ditu mozioak. Bukatzeko getariarrei igandean esteladak jartzera euren balkoietan gonbidatzen ditu eta gaur udaletxean banatuko dituztela jakitera eman dute.

Gure Esku Dagoren babesa

Gure Esku Dagok zera adierazi du aste honetan, «Kataluniako herria bizitzen ari den momentu historikoaren aurrean Getariako Gure Esku Dagok babes osoa eskaini nahi die bertako herritarrei demokraziaren alde egiten ari diren lanarengatik. Horrela, larunbatean Bilbon egingo den manifestaziorako autobusa antolatu da bertaratu nahi duten getariarrei garraioa erraztu asmoz. Autobusa 16:00etan aterako da eta izena Harritarten eman behar da lehenbailehen. Bestalde, igandean, erreferendumaren egunean, elkarretaratzea egingo da herriko plazan 12:30ean. Bertan argazki erraldoi bat aterako dugu. Herritarrak beraien ikurrinak eta esteladak ekartzera animatzen ditugu».

Fotos

Vídeos