Getariako Eskubide Sozialen Kartak kontzentrazioa egingo du asteartean

Kartela. Deialdia iragartzeko. /
Kartela. Deialdia iragartzeko.

Hezkuntza Publikoko langileen grebari elkartasuna eta babesa adierazteko herritarrak gonbidatu dituzte plazan elkartzera 18:00etan

JUAN MARI ZUBIAURRE GETARIA.

Datorren asteartea, hilaren 12an, Hezkuntza Publikoko langileak greba egitera doaz 'Lan baldintzak hobetu, hezkuntza eraiki' lemapean, tartean Getariako Iturzaeta Herri Eskolakoak.

Getariako Eskubide Sozialen Kartatik langileei elkartasuna eta babesa adierazteko kontzentrazioa antolatu dute herriko plazan. Arratsaldeko 18:00etan egingo da eta kalitatezko euskal eskola publikoa defendatzeko izango da.

Sindikatuen aldarrikapenekin bat egiten dute Kartakoak (ELA, LAB eta STEE EILASen aldarrikapenekin) eta hauen berri ematen dute ondorengo zerrendan; «Egun BPGren %3,5eko den Eusko Jaurlaritzaren hezkuntza inbertsio publikoa handitzea gutxienez Europar Batasuneko batezbestekoa ezarriz eta progresiboki Unescok gutxienekotzat jotzen duen %6ra iritsiz; azken urteetan eman den matrikulazio igoera, lan-kargen handitzeari eta ikastetxeen behar izanei aurre egiteko plantilak gutxienez 1.800 langiletan handitu; egun %38koa den behin-behinekotasuna, %6ra murriztu. Horretarako 6.000tik gora lanpostu egonkortuz kolektibo ezberdinetan; ikasle-ratioak %10 murriztea; soldata murrizketa eta %15 murriztu den irakasleen eros-ahalmena berreskuratzea (gutxienez 32.500 euroko galera metatua 2009tik Haur eta Lehen Hezkuntzan eta 41.100 euro Bigarren Hezkuntzan); egun kasu askotan astebetera atzeratzen diren ordezkapenak lehen egunetik egitea kidego guztietan; bajak zigortzeari utzi eta lehen egunetik bere osotasunean ordaintzea; erretiroa errazteko eta laguntzeko neurriak berreskuratzea; Lomce Euskal Herriko gure ikastetxeetatik ateratzea eta honen moldaketa hutsa den Heziberri bertan behera uztea; Hezkuntzaren merkantilizazioa alde batera uztea, egungo desorekak gaindituz hezkuntza garapen pertsonal eta sozial integralerako tresna izan dadin (kohesio soziala, integrazioa, aniztasuna, berdintasuna, hezkidetza oinarri); ikasle euskaldun eleaniztunak sortzeko euskarazko murgiltze eredua garatzea; balizko Hezkuntza legearen aurrean sindikatu, hezkuntza eragile eta herritarron parte hartzea eta iritzia aintzakotzat hartzea».

Hori guztia dela-eta, getariarrei «kalitatezko euskal eskola publiko bat izateko behar diren baldintzak defendatzera» deitzen diete Getariako Eskubide Sozialek Kartako kideek eta bertaratzera gonbidatzen dituzte.

Contenido Patrocinado

Fotos

Vídeos