Errenta aitorpena euskaraz egiteko deia egin dute UEMAk eta Orioko Udalak

DV ORIO.

Urtero bezala, Orioko Udala eta UEMA kanpaina egiten ari dira elkarlanean, herritarrek errenta-aitorpena euskaraz egin dezaten bultzatzeko. Kontuan hartuta herritarren gehiengo handi batek autolikidazio proposamena jasotzen duela gaur egun, horri eman nahi izan dio aurten garrantzia UEMAk. Autolikidazioa onartzerakoan (telefonoz deituta edo internet bidez), euskaraz nahi duzula esanez gero, hortik aurrera hala etorriko zaizkizu Ogasunarekiko komunikazioak zuk besterik erabaki arte. Bide hori bultzatu nahi du UEMAk.

Aurtengo errenta aitorpenaren kanpaina apiriletik ekainera bitartekoa izango da.

Urtez urte gehiago

Herritar gero eta gehiagok egiten du errenta-aitorpena euskaraz; baina, oraindik ere, askoz gehiago dira gaztelaniaz egiten dutenak. Udalaren asmoa da urtez urte datu horiek hobetzen joatea. Iazko kanpainan, esaterako, herritarren %24,92k egin zuen aitorpena euskaraz, azken urteotako daturik onena.

2009an hasi zen kanpaina hau eta orduan, 308 herritarrek (%11) egin zuten errenta aitorpena euskaraz. Geroztik, goruntz egin du. Azken urteetan, 2015ean, 715 herritar izan ziren (%23,98) eta 2016an Orion euskaraz egindako aitorpenak 752 (%24,92).

Nola egin euskaraz?

Errenta aitorpena egiteko hiru modu daude eta guztietan erabili daiteke euskara:Mekanizatuan, hitzordua hartzerakoan, adieraz ezazu Ogasunarekin harremanak euskaraz izan nahi dituzula. Ogasunarekin aurrez aurreko harremanak, nahiz eta telefono edo internet bidezkoak euskaraz izan ditzakezu, horrela eskatzen baduzu. Ogasunak sinatzeko ematen dizun orria ere euskaraz jaso dezakezu.

Bestetik, autolikidazio proposamenean, jasotako proposamena onartzerakoan, euskaraz egin nahi duzula esan, eta aurrerantzean Ogasunak agiriak euskaraz bidaliko dizkizu. Azkenik, internet bidezkoan, errenta programaren euskarazko bertsioa jaitsi internetetik eta hobetsitako hizkuntza atalean euskara aukeratu.

Aholkularitza baten bidez egiten baduzu, propio adierazi beharko diozu aitorpena euskaraz egin nahi duzula. Beste moduren batean egitean baduzu (finantza erakunde batean, adibidez), euskaraz egiteko eska dezakezu.

Contenido Patrocinado

Fotos

Vídeos