Bihar hasi behar zuen 'Balenciaga auziko' epaiketa atzeratu egin da

Balenciaga. Museoa egin zeneko epaiketa atzeratu da. /  AMAXKAR
Balenciaga. Museoa egin zeneko epaiketa atzeratu da. / AMAXKAR

Mariano Kamio Getariako alkate ohi eta auzipetu nagusiaren abokatuak epaiketa atzeratzeko eskatu zuen

JUAN MARI ZUBIAURRE GETARIA.

Atzeratu den auziak Balenciaga Museoa eraikitzerakoan ustez izandako irregulartasun eta delituak epaitzea du helburu. Hasiera batean bihar hasi behar zuen epaiketak baina auzipetu nagusia den Getariako alkate ohia Mariano Kamioren osasun egoera dela eta, bere abokatuak atzerapen bat izatea eskatu zuen eta onartua izan da.

Donostiako Zigor Arloko 2. Epaitegiak onartu eta gutxienez sei hilabeteko atzerapena eman du. Orduan berrikusiko dute Kamioren osasun egoera. Otsailean eskatu zuten atzeratzea kontutan izanik Kamiok infarto bat izan zuela eta ondorioz ebakuntzak egin zitzaizkiola. Egoera horren ondorioz orain epaiketa bat aurrera eramateko egoeran ez dela aurkitzen azaldu zuten eta bertan behera uztea eskatu.

Kamiorentzat zortzi urteko kar-tzela zigorra eskatzen du Gipuzkoako Fiskaltzak, Julian Argilagos arkitektoarentzat lau urtekoa eta obrak bere gain hartu zituen Rolando Pacielentzat lau hilabeteko isuna.

36 lekuko

Zazpi urtetako ikerketa baten ondoren zetorren epaiketa hau. Apirilak 4an hasi beharrekoa eta orain atzeratua. Hasiera batean apirilak 13a bitartean luzatuko zela aurreikusita zegoen. Epaiketaren data asko luzatzen joan da eta horren arrazoi nagusia zera da, Julian Argilagos arkitektoa desagertuta egon dela denbora luzean eta azkenean nazioarteko atxilotze agindu bat luzatu behar izan zen. halere eskera honek oraindik ez du emaitzarik eman eta Argilagosen berririk ez dago. Epaiketa honetarako 36 lekuko deituko zirela aurreratu zuten epaitegitik baina hauek ere orain itxaron egin beharko dute epaiketa data berri bat jarri bitartean.

Contenido Patrocinado

Fotos

Vídeos